Simon Lyngep angunni nipilersorfimmut qatippaa

Simon Lyngep Nunatsinni tusarnaartitsisaqattaarnini aallarteruttorpai.
Allattoq Elisa Isaksen
apriilip 16-at 2014 06:39

Qaqortup katersortarfiani ataasinngormat tusarnaartitsivoq. Kisimiilluni misigissusilimmik tusarnaartitsineranut tusarnaariat 100-t sinnillit tusarnaariartut, sermitsiaq.ag-mi allaaserineqarpoq.

Tusarnaartitsinermini angunni Karl Lynge nipilersorfimminut qaqitippaa, taassumalu ernini supputaasamik ingiorlugu arlalinnik atueqatigalugu.

Simon Lyngep tusarnaartitseqattaarluni sinerissami angalanermini pilersaarutigineqartutut Nuummi, Katuami tallimanngorpat nipilersussaaq, sapaatiuppallu poorskip ulluani, Ilulissani Hotel Arctic-imi tusarnaartitseriarluni, angalanini naggaserlugu Sisimiuni festivalimi nutaami, Arctic Sounds-imi apriilip 25-anni tusarnaartitsissalluni.

Simon Lyngep nuuteeraliaa nutaaq "The Absence of Fear", apriilip aallaqqaataanni saqqummersinneqarpoq. Nuuteeraliaa nersualaarneqaqaaq. Ilaatigut P4-mi sapaatip akunnerani saqqummersitatsialattut toqqarneqarluni aamma nittartakkami lydtapet.net-imi amerlanerpaamik arfinilinnik ulloriannaffiusinnaasumi tallimanik ulloriannalluni.