Sermitsiaq.AG-ip pisortaa: Siulersuisut ataatsimiinnissaat aalajangiisuussaaq

 

Nutaarsiassaqartitsivik Sermitsiaq.AG piffissap sivikitsup iluani ukiormannamut aningaasartuutissamini 2,5 million koruuninik sipaarniartariaqalerpoq. Naalakkersuisummi nutaarsiassaqartitsiviup pisortaanut, Poul Krarupimut, tapiissutinik qinnuteqaraluarnerannut itigartitsillutik nalunaaruteqaqqammerput.

Itigartitsinermut tunngavilersuutaavoq suliffeqarfik tapiiffigineqarnissaminut ingerlalluarpallaarsimasoq.

 

Aleqa Hammond feerialereersoq tusagassiuutinut nalunaarut ippassaq ualikkut nassiunneqarpoq. Kisianni Naalakkersuisut siulittaasuata tullia, Steen Lynge, nassuiaasinnaavoq.

 

- Tapiissutit suliffeqarfinnut pisariaqartitsinut tunniunneqartarput, imaanngitsoq suliffeqarfinnut aningaasaqarnermikkut ingerlalluartunut, Steen Lynge oqarpoq.

 

AAMMA ATUARUK: Sermitsiaq.AG-p tapiissutisiarisartakkani annaavai

 

Sermitsiaq.AG ukiuni kingullerni pingasuni sinneqartoorsimavoq, akiitsuminullu akilersuilluarsimalluni, Steen Lynge ilaatigut taama tikkuaavoq.

 

- Suliffeqarfik tapiissutisinissaminut pisariaqartitsisimagaluarpat, taava tapersimassangaluarparput. Kisianni suliffeqarfik namminersortaq taama ingerlalluartigippat pisortanit tapiiffigineqarnissaa pisariaqanngilaq.

 

Tupaallatsiallanneqartut

 

Ukiumi nutaamit 2,5 million koruuninik isertitakinnerulluni ingerlasariaqalernissamut kalerinneqarneq suliffeqarfiup namminersortup, ukiorpaalulluni atasimasup, tupaallaatigaa.

 

- Tupaallatsinneqalaarpugut, aamma aalajangerneq paasisinnaanngilarput, kisianni tusaatissatut tiguarput, Sermitsiaq.AG-ip pisortaanera, Poul Krarup, oqarpoq.

 

Taassuma tapiissutinik annaasaqarneq Sermitsiaq.AG-mut qanoq kinguneqarumaassanersoq eqqoriarusunngilaa. Sermitsiaq.AG nittartakkatigut, aviisitigut atuagassianillu naqitatigut saqqummersitsisartoq siorna 3,3 million koruuninik sinneqartoorpoq. Siulersuisullu tullissaanik ataatsimiinnissaat suliffeqarfiup siunissaanut aalajangiisuujumaartoq, Poul Krarup oqarpoq.

 

 

Aningaasaqarmut Inatsimmi ilaasoq

 

Nutaarsiassaqartitsivik 2012-imi 1,5 million koruuninik tapiissutisivoq, ukiullu tulliani tapiissutit 2,5 million koruuninut qaffanneqarput. Aningaasaqarnermullu Inatsimmi ukiormannamoortumit 2,5 million koruunit 2017 ilanngullugu tapiissutigineqarsinnaasut naatsorsuutigineqarsimapput, taamaammat tapiisoqannginnissaanut aalajangerneq pisortamut pakasaavoq.

 

Sermitsiaq.AG siusinnerusukkut naqitanik siammarterinerminut tapiissutinik annaasaqarnikuuvoq. Taamanikkullu nutaarsiassaqartitsivik allatut tapiissuteqarfigisarniarlugu aalajangersaasoqarpoq. Taamanilu tassa "Nuna tamakkerlugu aviisinut tapiissutit" atuutilersinneqarput.

 

Naalakkersuisut siulittaasuata oqarnera malillugu, aningaasat 2,5 million koruunit Aningaasanut Inatsimmi nutaarsiassaqartitsivik Sermitsiaq.AG-mut illuartinneqarsimasut, "nutaarsiassaqartitsivinnit nunatsinneersunit allanit tamanit" maanna qinnutigineqarsinnaanngorput.

 

Aningaasat tapiissutissatut uninngatinneqartut Naalakkersuisut siulittaasuata ataaniipput, kultureqarnermut naalakkersuisup, Nick Nielsenip, ilaatigut tusagassiuuteqarnermut politikkeqarnermut akisussaasuusup, ataaniinnatik.