Sermersuup Kanukoka suleqatiseraa
Aningaasaqarnermut naalakkersuisup nalimmassaarinermi aaqqissuussinissatut siunnersuutaa Kommuneqarfik Sermersuumi Kommunalbestyrelsimi ilaasortat ataatsimoorlutik akerleraat.
Siumup Atassutillu kommunimi gruppianni siulittaasoq Martha Abelsen, isumaqarpoq, maannamut siunnersuutaasoq attanneqarsinnaanngitsoq, isumaqarlunilu KANUKOKA-mi suleqatiserigaanni isumatusaarnerussasoq.
- Maani allaffissornikkut sulisut kaammattorivut, KANUKOKA saaffigalugu peqatiseralugu angorusukkaluaqalugu, kommunit taakku sisamaalluta tamataalluta Naalakkersuisumut oqariartuuteqarnissarput erseqqinnerusoq, Martha Abelsen oqarpoq.
AAMMA ATUARUK Asii Chemnitz Narup: Nalimmmassaarineq kommunimi sulisunik eqquisinnaavoq
Kommunilli allat Sermersuup Kommunianut tapersiinissaat borgmester Asii Chemnitz Narupip, IA-meersup, naatsorsuutigingilaa.
Aningaasaqarnermut nunamullu namminermut naalakkersuisup Vittus Qujaukitsup allakkamini erseqqissorujussuarmik oqaatigereerpaa, kommuneqarfiit allat pingasut kissaataat malillugit matumani ilusilersuisoqarnikuusoq. Taamaammat ajoraluartumik naatsorsuutigisinnaanngilara, taakkunannga taperserneqarnissarput, borgmesteri oqarpoq.
AAMMA ATUARUK Borgmesteri immikkut ittumik ataatsimiigiaqqusivoq
Taamaakkaluartoq taassuma erseqqissarpaa, ikiuerusussinnaasut qujarutissallugit.
- KANUKOKA-p sulisui naatsorsueqqissaarnerpassuarni ikiuutaaniarpata, ajunngilaq qujanassaqaaq. Assassaarutingajavittussaassagatta aamma, Asii Chemnitz Narup oqarpoq.
