Sermersooq: Utaqqiisaagallartumik inissiat akeqartinneqalissapput
Kommuneqarfik Sermersuumi sulisunut inissianut utaqqinermi, utaqqiisaagallartumik inissiani akeqanngitsumik najugaqartoqaqqissanngilaq. Kommunalbestyrelsi ataasinngornermi aggustip 20-ni ataatsimiinnermini taamatut aalajangiivoq.
Allattoq Simon Uldum -
aggustip 21-at 2014 11:18
Kommunip Sulisoqarnermut immikkoortortaqarfiata eqqartuussissuserisoq Niels Hansen Dam nalileeqqullugu qinnuigaa, akileeqqusinerlu inatsisitigut akuerisaavoq, kommuneqarfik nittartakkamini taama ilisimatitsivoq.
Kommunimut ukiumut 12 mio. kr.-inik aningaasartuuteqarfiusarpoq
Agguaqatigiissillugu Kommuneqarfik Sermersuumi inuit 58-it utaqqiisaagallartumik inissiani najugaqarput, tamannalu kommunimut ukiumut 12 millionit koruuninik aningaasartuuteqarfiusarpoq.
Aningaasartuutit taakkua ilaat nutaamik nammineerluni akiliisalernikkut matussuserneqarsinnaapput.
Malittarisassat piareerpata, nutaamik atorfinitsitsinerni tamani nammineerluni akiliisarneq atuutilissasoq, Kommuneqarfik Sermersooq ilisimatitsivoq.
