Sermersooq: Ulloq aggustip ulluisa 20-at ulluuvoq pingaarutilik
Pingasunngorneq aggustip ulluisa 20-at tassaavoq ulloq pingaarutilik, Kommuneqarfik Sermersuumi partiit siuttui ilaatigut allapput.
Tassami nalimmassaanermut aaqqissuusseqqinnissaq 2015-imoortussaq oqallisaaqisorlu Naalakkersuisut ulloq taanna aalajangiivigisussaammassuk.
AAMMA ATUARUK Kommunit aningaasaqarnerannik naligiissaarineq paasiuminarsarlugu
Aalajangigassaq Kommuneqarfik Sermersuumuinnaq pingaaruteqarani, nunalli sinneranut aamma pingaaruteqartoq, partiit taakku siuttuisa tusagassiuutinut nalunaarummi oqaatigaat.
- Qaqutigoorpoq partiit imminnut akimorlutik taamatut tusagassiuutinut nalunaaruteqartarnerat. Tamatuma ersersippaa partiit akunnitsinni aamma suleqatigiissinnaasugut.
Ineriartortitsinermi qimuttuusoq unikaallatsinneqaratarsinnaavoq
Nalimmassaanermi aaqqissuusseqqinnermi Kommuneqarfik Sermersuup 117 millionit koruuninik akiliuteqarnissaa partiit tamattaalluta akuersaarsinnaanngilluinnarparput, partiit ataatsimoorullugu allaaserisaminni ilaatigut allapput, nangillutillu:
- Ullumikkut kommune aningaasatigut inissisimanerloreeqisoq nalimmassaanermi aaqqissuusseqqinnerup nassatarisaanik suli aningaasatigut ajornartorsiornerulernissaa qularutiginngilarput.
AAMMA ATUARUK GA: Kommuneqarfik Sermersooq ujajaaffigineqarpoq
- Kommuneqarfik Sermersuumi innuttaasut sullinneqarnermikkut aammalu soraarsitsiortornernik kinguneqarsinnaanera ernumamartoqartipparput, Mette Rasmussen Larsen, Siumumeersoq, Ove Frank Heilmannip, Atassummeersup, Tikkili Isaksen, Inuit Ataqatigiinneersup, Mike Andersenillu, Demokraatineersup, tusagassiuutinut ataatsimoorullugu nalunaarumminni ilaatigut allapput.
