Seqerngup qaamarnganik tigooraassutit misileraassutigineqalersut

Nukissiorfiit misileraanerminni paasiniarpaat, seqerngup qaamarnga atorlugu kallerup inneranik qanoq annertutigisumik pilersuisinnaanissaq, tamannalu iluatsissappat ilaatigut siunertarineqarpoq, nunaqarfinni innaallagissiorfiit dieselimik ingerlatillit seqerngup qaamarnganik tigooraassutinik taarsersorneqarnissaat.

Ukiuunerani Nunarput taartaqisoq issittartorlu, seqerngup qaamarnga atorlugu innaallagissiorsinnaaneq misileraatitut maanna aallartinneqalersoq, Nukissiorfiit pisortaata, Henrik Estrupip oqaatigaa.

- Misileraanitsinni paasiniarparput seqerngup qaamarnga atorlugu innaallagissiutit kallerup inneranik qanoq annertutigisumik pilersuisinnaanersut. Misileraatissatut ikkussuutassatta maani atulernerisigut, naatsorsuutigaarput taakku innaallagissamik marloriaammik Danmarkimi atorneqartunut naleqqiullugit pilersuisinnaassasut.

Nukissiorfiit pisortaa, Henrik Estrup oqarpoq.

Misileraanermi paasiniarneqartut ilagaat, seqerngup qaamarnga atorlugu Nunarput innaallagissamik qanoq annertutigisumik pilersorneqarsinnaanersoq. Neriuutigineqarportaaq erngup nukinga atorlugu innaallagissiornerup oqilisaaffigineqarnissaa. Tassalu tamannarpiaavoq Nukissiorfiit anguniagaat.

- Seqerngup qaamarngata innaallagissiaa innaallagissiorfinnut pioreersunut ilapertuutaassaaq, tamanna ukiup affaani ukiorluunniit iluitsoq ingerlanneqassalluni. Tamatuma kingorna paasigutsigu taakku atorluarsinnaasut, taava Nunatta ilarujussuani taamaattunik ikkussuisinnaassaagut, Henrik Estrup oqarpoq.

Nunatta ilarujussua ukiuunerani taartuaannagajaattoq, Henrik Estrup ilisimalluarpaa, tamannalu seqerngup qaamarnga atorlugu kallerup inneranik pilersuinermi akornutaassanngitsoq, Nukissiorfiit pisortaata oqaatigaa.

- Seqerngup qaamarnganik tigooraassutit seqinnertinnagu soorunami kallerup inniliorsinnaanngillat. Seqinerli nuippat taava taassuma qinnguaasai apummut tuttarput qaamanermillu sakkortuumik pilersitsillutik, taamaalilluni kallerup innera annertuupilussuaq ukiumi pilersinneqartarpoq.

Nukissiorfiit pisortaata neriuutigaa misiliineq naammassippat paasisallu pitsaappata, taava seqineq atorlugu nukissiorneq sumiiffinni arlalinni atorneqarlersinnaanissaa.

- Assersuutigaluugu nunaqarfinni tamanna atorneqarsinnaavoq, tassami taakkunani innaallagissiorfiit dieselimik ingerlateqarput akisuupilussuullutillu. Seqerngup qaamarnganik innaallagissiornissamik misileraaneq iluatsissappat, taava taakku atorlugit nunaqarfinni innaallagissiorfiik dieselimik atuineri annikillisissinnaavarput immaqalu innaallagissiorfiit dieselitortut ukiup ilarujussuani uninngatinneqarsinnaallutik. Tassalu misileraanitsinni paasiniagassatta tamakku ilagaat. Nukissiorfiit pisortaa, Henrik Estrup oqarpoq.