Sarap angutit unammillerpai
Arnat ataasiakkaarneranni Sara Lindskov Jacobsen 17-iinnarnik ukioqaraluarluni nunatsinni pikkorinnersaavoq ajornartorsiutiginagulu Nuummi illoqarfimmi pissartanngorniunnermi ataasiakkaarnermi ajugaassagunarluni. Taamaammat pikkunarnerusumik unammilligassarsiorluni angutit ataasiakkaarneranni unammeqataanialerpoq.
Kisianni pulje-nut angutit makitsineranni iluatsitsivallaanngilaq. Tassami Sara Lindskov Jacobsen-ip puljeqatigisussanngorpaa angutit ataasiakkaarneranni nunatsinni pissartaq Frederik Elsner aamma siornatigut Island Games-imi pissartaasoq. Pulje-ni ajugaasut kisimik ingerlaqqittartussaammata Sara Lindskov Jacobsen ataasiakkaarnermi marloriaannarluni unammerataannaavoq.
- Kisianni nuannerpoq takullugu timersuunni qanoq pimoorutsigineraa, Frederik Elsner KNR-imut oqarpoq.
- Aamma pissanngatigaara qanoq ineriartorsimanerata takunissaa. Unnugu unammilerutta tamanna takusinnaajumaarpara, Frederik Elsner oqarpoq.
Aamma arnat ataasiakkaarnerani arnallu iligiiaarneranni unammeqataaniarpoq Rina Møller Lorentzen iligissallugu taanna aamma nunanut allanut unammisartuuneeernikuuvoq. Arnat ataasiakkaarneranni taakku imminnut unammissagunavipput. Sara Lindskov Jacobsen U-19-ni arnat angutillu akuleriillutik unammineranni peqataaniarpoq Hans Brummerstedt iligissallugu.
- Angutinut unammigaangama assut pissarsiaqartarpunga. Angutit sukkanerupput saassussiniarnerullutillu arnat unammeriaasiannut sanilliullugu, Sara Lindskov Jacobsen KNR-imut oqarpoq.
- Neriuutigisimagaluarpara makitsinermi iluatsitsinerussallunga. Nuannersimassagaluarpoq taamaaqatima anguni unamminissaat. Atagu takoriartigu Frederik Elsnerimut point-inik qassinik pissarsisinnaanersunga, Sara Lindskov Jacobsen oqarpoq.
Frederik Elsnerip seeqquni suli ippigisarpaa taamaattoq GM siunnerfigalugu sungiusarnini aallarteqqereerlugu. Sulili siusippallaarnerarpaa nunanut allanut unammisartunngoqqinnissami oqaatiginissaanut.
- Apeqqutaalluinnarpoq nuna tamakkerlugu sungiusaasoq aperippat qanoq ikkumaarnersunga, Frederik Elsner oqarpoq.
U-17-it Narsamiit tikeraartoqarput. Tassaavoq Nuka Mark Nielsen Narsamiit Nuummi illoqarfimmi pissartanngorniuttunut unammeqataajartortoq. Taanna U-15-ni unammisartuugaluarpoq taamaattoq ilimagineqarpoq U-17-ni Nick Ørbæk Jacobsen-ilu pikkunartumik unammiumaartut.
