Sara Olsvig: Amigartoorneq ulorianarsinnaavoq
Piffissami aggersumi Aningaasaqarnermut Naalakkersuisoq isumaqatiginninniarnerit
Sara Olsvigip aningaasanik isaatitsilernissamut siunnersuutinik tigussaasunik aningaasunut inatsisissatut siunnersuummi takusaqarsinnaannginnini ernumanartortaqartippaa.
- Tigussaasunik isertitsisussaasunik takutitsisinnaanngikkaanni, amigartooruteqarluni ingerlaniaraanni, ulorianartorsiortoqarsinnaavoq ukiut tulleriit arlarlit. IA-mi ajorinngilarput amigartooruteqarluni ingerlaniarneq. Kisianni takusinnaasariaqarparput ukiuni tulliuttuni sukkut aningaasanik isertitsisoqarniarnersoq. Isumaqarpaungalu tanna suli takunngikkipput, Inuit Ataqatigiit siulittaasuat, Sara Olsvig, radioaviisimut oqarpoq.
Aaamma oqaatigaa qinigaaffik qaangerlugu aningaasarsiorfiusinnaasunik aningaasanut inatsimmi siunnersuusiortoqartariaqartoq.
Naalakkersuisulli naatsorsuutigaat aningaasat ukiuni tulliuttuni isaalerumaartut, soorlu aamma ukiup siuliani taama naatsorsuuteqarsimasut.
Taamaammat Vittus Qujaukitsoq isumaqarpoq amigartooruteqarnissaq illersorneqarsinnaasoq.
- Ukiut sisamat qinigaaffiup iluani isertat aningaasartuutillu oqimaaqatigiinnissaat anguniarparput.
Vittus Qujaukitsoq taama ullumi radioaviisimut oqarpoq nangillunilu:
- Amigartooruteqarnissaq illersorsinnaavarput naatsorsuutigigatsigu suliffissaaleqineq aappaagu appariartulissasoq, aammalu inuussutissarsiornikkut siuariartorneq sunniutilerpat aningaasat isaatitassat amerliartulerumaartut, Aningaasaqarnermut naalakkersuisoq oqarpoq
Sara Olsvigilli siunnersuutit tigussaanerusut eqqartorusuppai.
- Takornarissat umiarsuakkut tikittartut eqqarsaatigalugit qanoq isertitsisoqarnerusinnaanera tikkuarneqartoq, iliuuseqarfigineqarnerusariaqartut tikkuarusuppara. Assersuutigalugu takornarissat timmisartukkut tikittartut, aasaanerani taamaallaat tikittarnartik ukiup sinnera tamaat atorluarnerunissaat iliuuseqarfigineqartariaqarpoq. Kiisalu inuussutissarsiornikkut suut ineriartortinneqarsinnaanersut isumaqarpugut sammineqarnerusariaqartoq, Sara Olsvig oqarpoq.
