Saqqummersitsineq: Nunatsinni inuuneq assiliartalersorlugu
KØBENHAVN: Kalaallit Nunaanni inuunerup assigiinngisitaartuunera Nunarsuarmioqatigiit paasisariaqarpaat.
Assilissanik Københavnimi Kalaallit Illuutaanni saqqummersitsinermi pingaarnertut tamanna oqariartuutaavoq. Saqqummersitsinerlu Greenland Eyes Film Festivalimut Københavnimi pisussamut atatillugu ingerlanneqassaaq.
Assiliisartut, nuummiu Inuuteq Kriegel, aamma polenimiu Filip Gielda, aamma Nuummi najugaqartoq, saqqummersitsisuupput.
- Kalaallit Nunaata Nuummi najugaqartunit qanoq isigineqarnera inunnut Kalaallit Nunaannik tusagaqarsimanngisaannartunut takutikkusupparput, Kalaallit Nunaata qanoq nutaaliaatiginera ersersinniarlugu, Filip Gielda oqarpoq.
Kalaallit Nunaanni piviusoq takutikkusuppaat
- Kalaallit Nunaat pillugu isummat pigiliutiinnakkat amerlaqimmata tamanna pisariaqarsoraarput. Aamma Kalaallit Nunaat pillugu ilisimasat nalinginnaasut Kalaallit Nunaatalu nunarsuarmut akuunera pillugu ilisimasat killeqartupilussuupput, taamaammat Nuup qanoq pisoqarfiunera ersersikkusupparput. Piviusoq ulluinnarnilu inuuneq qanoq isikkoqarnerat, Inuuteq Kriegel oqarpoq.
Inuit 13-it pineqartut ilaatigut tassaapput Aleqa Hammond, "Kunngi" aamma Nuka Bisgaard - taakkulu sulinerisa nalaani suliffiullu avataani assilineqarsimapput, apersorneqarnerinilu ilaatigut asanninneq, atoqatigiinneq uumissuinerlu sammineqarput. Qanoq inuuneqarnerisa paasisaqarfiginissaat siunertaralugu taamatut apersorpagut, Inuuteq Kriegel oqaluttuarpoq.
Atuaganngorlugu atuakkatullu naalaagassiatut saqqummersinneqassaaq
- Politikerit, eqqumiitsuliortut, qalipaasut nipilersortartullu pineqartut. Inuit siammasinnerpaamik tamaasilluta oqaluttuariniarsaraagut. Aammali tassaapput tusagassiuutitigut nuimasuusut, tamanna pissutigalugu aamma toqqarpagut. Kalaallit Nunaat pillugu immikkut ittumik suliaqarput, Kalaallit Nunaanni Nuummilu immikkut inissisimasuullutik. Tamannalu pissutigalugu aamma toqqarpagut.
Assilisat atuaganngorlugit saqqummersinneqarnissaat pilersaarutaavoq, soorlu aamma atuakkatut naalaagassiatut saqqummersinneqarniartut. Assit taamasillutik siammarteruminarnerussammata.
Assinik saqqummersitsinermut atatillugu nittartagaq alakkaruk
