Pingasunngorpat oqallisilissapput. Inatsisartunut qinikkat aalisarnermut inatsisissatut siunnersuut oqaluusereqqilissavaat. Aappassaaneeralutik oqaluuserinnissapput, kingullermillu oqaluuserineqarneraakunnernik arfineq-marlunnik sivisussuseqarpoq.

Inatsit oqallisaajuartuartoq ukiut 20-t sinnerlugit suliarineqarpoq. Aalisartut, ilisimatusartut, Polar Seafood minnerunngitsumillu qinikkat ilungersuutiginnipput, naalakkersusorlu Kim Kielsen (Siumut) aalisarnermut inatsit Inatsisartuni akuerineqanngippat naalakkersuisutut tunuarniarnerarpoq.

Inatsisartut aalisarnermut ataatsimiititaliaata inatsisissatut siunnersuut qaammatip ataatsip missaani maanna oqaluuserereerpaat. Isumaliutissiissullu ataatsimiititaliami ilaasortat eqqarsaatigisaannik ernumassutigisaannillu allattorsimasortalik aqagu naammassissavaat.

Isumaliutissiissut taamaammat pissanganartoq

Jens Thorin KNR-imi aaqqissuisuuvoq, taassuma aalisarnermut inatsisissap nutaap pilernera ukiorpassuanngulersuni malinnaaffigaa. Isumaliutissiissut sooruna taama pissanganartigisoq?

- Isumaliutissiissut Inatsisartut pingasunngornermi oqallisiginninnissaannut pingaaruteqarsinnaammat pissanngarpoq.

- Ataatsimiititaliaq isumaliutissiissuteqarnikkut inatsisissatut siunnersuutip akuerineqarnissaa innersuussutigisinnaavaa, immaqa allannguutissanik siunnersuuteqarlutik immaqaluunniit taama iliornatik. Ikinnerussuteqartut muminganik sammisumik oqaaseqaateqarsinnaapput. Ataatsimiititaliami ilaasortat arlallit sinerissap qanittuani qaleralinniarnerup qitiusumik pingaaruteqarfiani qinigaapput. Taamaammat Siumup IA-llu ataatsimiititaliami ilaasortaatitaasaqinigaaaffimminni soqutigisat tuniulliutillugit naalakkersuisoqatigiit soqutigisaat pingaartittariaqarpaat.

Aalisartut aalisarnermut inatsisissatut siunnersuut apriilip 11-ani siullermeerneqarmat akerliussutsimik takutitsipput. Assi © : Carsten Faurschou/ KNR

- Assersuutigalugu sinerissap qanittuani qaleralittassiissutit biologit innersuussutaannik amerlaneroqaat. Taamaammat aalisarnermut inatsimmi nutaami allanngortinneqassaaq. Tamanna Siumumit IA-miillu ataatsimiititaliami ilaasortat maannakkornit aalisartukinnerungaatsialersinnaanissaat ernumassutigisinnaavaat.

- Ataatsimiititaliaq isumaliutissiissummik ilumut naammassinnissanersoq pissannganassaaq. Qaqugu saqqummiunneqassanersoq ilisimanngilarput – immaqa aatsaat pingasunngorpat. Tamanna siunnersuutip pilersaarut malillugu suliarineqarneranik kinguneqarsinnaavoq imaluunniit suut tamarmik muminganut saassinnaapput.

Kinguartillugu? Qinersineq? Imaluunniit suna tamarmi ingerlarataaginnassava?

Okay. Taava Inatsisartuni pingasunngornermi oqallinnissamut kissasssertoqareerpoq. Qanoq pisoqarsinnaava?

- Aalisarnermut ataatsimiititaliaq isumaliutissiissummik suliareeqqiinissamut piffissaqarnerunissamik Inatsisartuni siulittaasoqarfimmut qinnuteqarsinnaavoq. Taamaattoqassappat Inatsisartuni aappassaaneerisoqarnissaanut upernaakkut ataatsimiinnermi nutaamik ulluliisoqartariaqassaaq.

- Ima isumaqatigiinngitsigisinnaapput allaat Naalakkersuisoqatigiit ataatsimiinnermi matumani isumaqatigiissinnaannginneranik kinguneqarluni, aalisarnermullu inatsisissap aappassaaneerneqarnissaa ukiakkut ataatsimiinnissamut kinguartinneqarsinnaalluni.

- Inatsisartunilu ilaasortat ilaat inatsisip pingajussaanik naggataamillu maajip 16-iani taasissutigineqarnissaanut taasinnginniarlutik imaluunniit akerliisumik taasisinnaallutik sioorasaaruteqarsinnaapput. Tamanna marlunnik kinguneqarsinnaavoq: Naalakkersuisut siunnersuutip suliarineqarneranik unitsitsigallarsinnaapput. Imaluunniit naalakkersuisoqatigiinni partiit piffissaanngitsukkut qinisoqarnissaanik piumasaqaateqarsinnaapput. Tamarmilli isumaliutersuutaannaapput. Suna tamarmi ajunngitsumik ingerlasinnaavoq aammali sammiveqanngilersinnaalluni.

- Naalakkersuisoqatigiinni qinikkat akornanni susoqarnera ilisimanngilarput. Siumulli Aalisarnermut ataatsimiititaliamut ilaasortaat ataatsimiititaliami sulineq nuannernersoq aperigatsigit oqaaseqarumanngitsut ilisimavarput.