Sap. ak. 18 meeqqat peqatigalugit Brugsenimi Qaqortumi malunnartinniarneqassaaq

Sapaatip akunnera 18 - tassa sapaatip akunnerani tulliuttumi - imigassartorfiusussaanngitsutut aalajangiunneqarsimasumi Qaqortumi meeqqat sammineqarluassapput.
Allattoq Elisa Isaksen
apriilip 24-at 2014 04:06

Illoqarfimmi Brugseni, kommuni, atuarfik, qatserisartut, oqaluffik timersoqatigiiffiillu peqatigalugit meeqqat qitiutillugit sapaatip akunnerani 18-imi iliuuseqarniarput, tamatumunngalu atatillugu arfininngornermi maajip pingajuanni sapaammilu sisamaanni meeqqanut sammisassarpassuaqassaaq. Arfininngornermi sapaammilu tupersuaqassaaq tassanilu meeqqat tamalaanik tuniniaasinnaassallutik. Unammisitsisoqassaaq, ilaatigut boor'luliullammammik pizzaliullammammillu toqqaasoqassalluni, aamma Brugsenip saavani meeqqat tivoleqassallutik.

- Meeqqat peqatigalugit sapaatip akunnerata malunnartinnissaanut qilanaarpugut, Brugsenimi siulittaasoq Lisbeth Søvndal Pedersen oqarpoq.

Pisulli nuannisartitsinerinnaassanngillat. Illoqarfimmi atuartut tamarmik sapaatip akunnerani 18-imi taqussanik naatitanillu akeqanngitsunik tuniorarneqassapput, aamma meeqqeriviit naatitanik akeqanngitsunik tuniorarneqassapput.

- Brugsenimi inuiaqatigiinnut akisussaassuseqarneq pingaartipparput. Inuiaqatigiinni annertunerpaamik sunniuteqarsinnaasumik immikkorutilinnik suliniuteqarpugut, inuiaqatigiinnilu suliniuteqarsinnaaneq uagutsinnut pingaaruteqarpoq, Lisbeth Søvndal Pedersen oqarpoq.  

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq