Sandgreen qanoq pineqassanersoq Qaasuitsup bormesteriata oqaaseqarfigiumanngilaa

Kommunaldirektør Lars Sandgreenip suliunnaarneranit ullut arlallit maanna qaangiupput, pisortatigoortumilli soraarsinneqarnissaa kommunalbestyrelsimit ataatsimiissutigineqaqqaartussalluni. Tamannalu maanna pivoq.
aggustip 22-at 2014 10:06

Kommunalbestyrelsip immikkut ittumik ataatsimiinnera naammasseqqammerpoq, borgmester Ole Dorphilli soraarsitsisoqarsimanersoq soraarsitsisoqarsimannginnersorluunniit KNR-imut oqaaseqarfigiumanngilaa, pineqartoq sulisunut ataasiakkaanut tunngasuummat.

Hans Eriksen, kommunip meeqqanut, kultureqarnermut sunngiffimmullu ingerlatsiviani pisortaasoq, Qaasuitsup Kommunia pisortaanerugallartutut ivertinneqarpoq.

AAMMA ATUARUK Qaasuitsup Kommuniata kommunaldirektørini soraarsinniarpalukkaa

Svend Hardenbergip Aleqa Hammondip naalakkersuisoqarfiani pisortaanertut atorfininneranut atatillugu, Lars Sandgreen 2013-imi juunip aallaqqaataani kommunaldirektøriugallartussatut ivertinneqarpoq septembarillu 28-ani kommunalbestyrelsimit pisortatigoortumik atorfinitsinneqarluni.

Lars Sandgreen kommunaldirektørinngunnginnermini kommunimi tassani inuussutissarsiornermut pisortatut atorfeqarpoq.