Rubinisiorfissaq piariilerpoq
Isumaqatigiissumi nutaami pingaarnerpaatinneqarput aatsitassarsiorfiup True North Gems Greenlandip nuaqavissunik sulisoqalernissaminut sulisussanillu ilinniartitsinissaminut pisussaaffilerneqarmat.
Isumaqatigiissutip nutaap kingunerilissavaa aatsitassarsiorfiup pilersinniarneqarnerani nunaqavissut 70 procentiissa sulisorineqarnissaat anguniarneqarmat 80 procentiilu ukiut pingasut qaaangiunneranni sulisorineqarnissaat.
Rubiinisiorfissami sulisussat tamarmik Kommuneqarfik Sermersuup suliffeqarnermut allaffia aqqutigalugu inuttassarsiuunneqartassapput , nunaqavissunit avataanillu pinnani suliffigineqarsinnaasut qulakkeerniarlugu
- Nuannaarutigaara taama isiornikkut innuttaaqatitsinnut suliffissanik qulakkeerinnissinnaanerput: Sulilersunut kisimi pinnani, inuiaqatigiinnulli tamanut isumalerujussuuvoq”, borgmesteri Asii Chemnitz Narup oqarpoq
Aatsitassarsiutileqatigiiffik isumaqatigiissuteqarnermi pissusaaffilerneqarpoq ukiuni siullerni marlunni suleqatigiiffiup ukiumut 250.000 koruunit atorlugit sulisussat ilinniartinnissaannut atortarneqartarnissaannik kingornalu ilinniartitsinermut ukiumut 1 million koruunit atorneqartarnissaannik.
Isumaqatigiissuteqarnermi aalajangiunneqarpoq - suliap ingerlanerani aalajangersimasumik tallimanik ilinniartoqartarnissaq saniatigullu nunaqavissut sulisunut siulittaasussatut, aammalu piiaaffimmi immikkut suliarisassanut, Nuummilu immikkoortiterivimmi sulisut ilinniartinneqartarnissaat.
- Rubinisiorfissaq nunatsinni taama ittut siullersaraat. Iluatsillugu nunatta sulisoqarnikkut piiaaffimmut taama ittumut sutigut tamatigut sulisoqarsinnaanera avammut takutissallugu pingaartuuvoq”, Asii Chemnitz Narup oqarpoq.
Rubiinisiorneq aallartinneqarpat nunaqarfimmi Qeqertarsuatsiaani innutaasunut iluaqutaassaaq. Kulturikkut ataatsimooqatigiinnermullu aningaasaateqarfiliortoqassaaq True North Gems aningaasaateqarfimmut 100.000 koruuninik aallarniutinik tunniussaqassaaq taakkualu 250.000 koruuninut qaffakkiartortinneqassallutik.
