Royal Greenland Kinamiunik sulisussarsivoq

Royal Greenland Kina-miunik tallimanik tikisitsinissamut akuersissutinik Kommuneqarfik Sermersuumit tunineqarpoq.

Qaasuitsup Kommunianut aamma qinnuteqartoraluartoq taanna itigartinneqarpoq. Qinnuteqaat alla suli akissutissarsineqanngitsoq Royal Greenlandip ilisimatitsissutigaa.

Kommuneqarfik Sermersuumit akuersissuteqartoqarallartillugu tunisassiornermi immikkut ilisimasallit tallimat, Paamiuni ulapaarfiup nalaani atorfinissinnaanngorput.

-Kommuneqarfik Sermersuumit tusarluarnerput nuannaarutigeqaarput. Ulapaarfiup nalaani sulisussaaleqisarnerput kommuunip paasisinnaasimammagu nuannaarutigeqaarput. Kina-miut tallimat Paamiuni atorfinitsissinnaanngorpavut, tunisassiorfimmilu ataavartumik tunisassiornissamut ikiuutaassapput, Sulisoqarnermik Pikkorissaanermillu Ingerlatsisoq Søren Olsen Damgaard oqarpoq.

Tunisassiornermik immikkut ilisimasallit ilaatigut sulisunik ilinniartitsisartussaapput, ingerlatsinermik pitsanngorsaallutik, sulisullu suliaminnik tulluusimaaruteqalernissaannut paasinninnerulernissaannullu aqqutissiuussissapput, taamalu tamanut nuannaarutaasumik iluaqutaasumillu, Royal Greenlandimi sivisunerusumik atorfeqarnissaminnut kajuminnerulernissamik kinguneqassalluni.

Royal Greenlandip siorna aasaanerani nunatsinneersunik sulisoqarniarnera iluatsissimanngilaq, suliartortitat ilarpassui suliffimminnik nakkutiginnissinnaanngimmata, pingaartumik inuttut ajornartorsiuteqarnertik peqqutigalugu.

-Qasigiannguanut Kina-miunik ukiut arlalialuit matuma siornatigut tikisitsisimanerput misilittagaqarfigilluarparput, Søren Olsen Dalgaard nassuiaavoq.

Royal Greenland Qaasuitsup Kommunia aamma Kommuneqarfik Sermersooq suleqatigalugit nunaqavissunik sulisussarsiorsimagaluartoq, tusagassiuutinut nalunaarummi taama allappoq.