Royal Greenland aamma Polar Seafood piginneqatigiissutinik paarlaapput

Aningaasanik piginneqatigiissutinik paarlaanneq suleqatigiikkunnaarnerlu annertuuliutaanngitsumik isumaqatigiissutaasoq, Polar Seafoodip siulersuisuini siulittaasup, Henrik Lethip oqaatigaa.
 
- Taama isumaqatigiinnerput annertuuliutissaanngilaq. Royal Greenlandip taamatullu uangut aalisakkerivitta, Polar Seafioodip avannaani aalisakkanik tunisassiornerput tamakkiisumik immikkut piginissaat qangali isumaliutigisarpagut.

- Aamma Royal Greenlandip Nunatta avannaani qaleralinnik tunisassiorneq annertunerusumik ingerlanniarlugu qangali neriuutigisarpaa. Tassalu tamanna maanna piviusunngorpoq, Henrik Leth oqarpoq ilanngullugulu oqaatigalugu, Royal Greenlandip Polar Seafoodillu nunarsuatsinni aalisakkanik niuerfinni, Nunatta imartaaneersunik tunisassianik niueruteqartarneq eqqarsaatigalugu nittarsaassisarnerup saqqummiussisarnerullu tungaasigut suleqateqarnertik ingerlatiinnarniarlugu isumaqatigiillutik.

Suleqatigiinnertik ingerlatiinnassavaat
- Soorlu assersuutigalugu Namminersorlutik Oqartussat Royal Greenlandilu peqatigalugit Japaniliartussaavugut decembarimi. Aamma isumaqatigiissutigaarput, soorlu Polar Seafoodi aalisakkanik tunissassianik amigaateqalersillugu Royal Greenlandimiit pisisinnaanerput isumaqatigiissutigalutigu.

Polar Seafoodip siulersuisuini siulittaasoq, Henrik Leth taama oqarpoq ilanngullugulu erseqqissaatigalugu suleqatigiikkunnaarnermi, Upernavik Seafoodimi aamma Polar Raajami ulluinnarni aqutsisut allanngortinneqassanngimmata, tassa Flemming Andersenip Upernavik Seafoodimi pisortatut atorfini ingerlatiinnassavaa taamatullu Henrik Eriksenip Polar Raajani pisortaanini aamma ingerlatiinnassallugu.