RG-ip ilinniartunik naapisimaaqatigiissitsinera peqataasut eqiiallaatigigaat
Katerisimaartitsineq ilinniartut ilaannut paasisanik nutaanik pissarsiffiusimavoq. Royal Greenlandimi sulisoqarnermut siunnersorti Ester Arens oqarpoq peqataasut amerlanerit nutaanik paasisaqarnerat nuannaarutissaasoq, ileqqut pitsaanngitsut allanngortinniarlugit namminneq iliuuseqarsinnaanertik paasimmassuk inuunermillu pitsaanerusumik inuuneqalersinnaallutik.
Tamannarpiaavorlu ilinniartut napisimaaqatigiissinnerannut siunertarineqartoq, ilinniartut imminnut takusinnaanerat ajunnginnerulersissallugu ileqqut pitsaanngitsut iliuutsillu ajunngitsut paasineqarnissaat iliuuseqarfigalugillu.
Ilinniartut iluaqutigisinnaasaminnik pissarsipput ileqqut pitsaanngitsut allanngortillugit ajunngitsunik iliuuseqarnissamut iliuusissaminnik pilersaarusiortinneqarlutik.
Suliffeqarfiup iliuusissatut pilersaarutai peqataasut nuannaarutigeqaat
Peqataasut ilaannut paasisanik nutaanik pissarsiffiulluarpoq, ilinniartut paasivaat Royal Greenland nunarsuarmi tamarmi ingerlatsivittut paasissallugu qanoq pingaaruteqartigisoq. Pingaartumik peqataasut nuannaarutigaat ingerlatsiviup periusissatut pilersaarutaanik paasinnikkamik.
Ilinniartut naapisimaaqatigiissinneqarnerat peqataasunit iluarisimaarneqartorujussuuvoq, ukiullu tamaasa pisartussanngorlugu Royal Greenland pilersaaruteqarpoq.
