Qimmit perlertut 19-it Ilulissani toqunneqartut

Nersutit nakorsaat uumasut peqqissusaannik nakkutilliisuutitaq Sanne Eline Wennerberg Ilulissani politiit Qaasuitsullu kommunia suleqatigalugu Ilulissani qimmit 19-it toqorartariaqarsimavaat, sumiginnagaarujussuarsimanerat pissutigalugu.
 
Sapaammi juulip 13-ianni qimmit qimuttut aqqaneq marluk toqorarneqarsimapput, marlunngornermilu allat arfineq marluk. Nersutit nakorsaat qimminut taamaattunut ornigukkaangami takusai nuannersuinnaaneq ajorput.
 
 -Takusat siulliit tassaasarput amii. Qillissuseqaratik tukattuusarput. Qimmit pamiutik aalatillugit imminut tatigisutut pissusilersortanngillat. Amerlasuutigut imullutik innangasarput, nukissaqanngingaartaramillu tikiukkaangattaluunniit soqutineq ajorpaatigut. Qasusorujussuusarput        takkuttullu soqutigissanagit, Sanne Eline Wennerberg oqarpoq.

AAMMA ATUARUK Ilulissani qimmit pingasut perlerlutik toqusimasut nassaarineqarput

Ilanngullugu oqaluttuarpoq toqoraaffissaminnut apuukkaangamik qimmit ilaat toqoreersimasartut.
 
Qimmit aallaallugit toqunneqarput kaallutillu qilalermata, uumatiinnaraluaraannimi suli annerusumik atugarliortinneqassammata.
 
- Meqquisigut attoraanni taamaallaat saarngit malugisassaasarput. Nukeqanngikkunik annikittuinnarnik nukeqartarput, minnerpaamilluunniit orsoqassanatik.
 
Taama oqaluttuarpoq nersutit nakorsaat Sanne Eline Wennerberg Jonas Løvschall-Wedel-imit apersorneqarluni. Suliat Ilulissani politiit maanna tigummivaat.