Qimminik naalliutsitsineq: Akuersissutit nalilersoqqittariaqarput
Maannali takornarialeriffiup annertunerpaaffigisaani, uumasut nakorsaat Sanne Eline Wennerberg Ilulissani qimminut paarinerlunneqarsimasunut kingumut orniguttartiaqarsimavoq, taakkunanngalu 19-it toqunneqartariaqarsimallutik.
Kommunip inuussutissarsiornermut takornariaqarnermullu ataatsimiititaliaani siulittaasup, Palle Jeremiassenip, aamma paasiuminaatsippaa, qimminik paarsinerluttoqarneranik tusarlerneqaqqissinnaagami.
- Akuersaarneqarsinnaanngilluinnarpoq, taamatut uumasunik naalliutsitsineq. Ilulissanik qalerallerivinnik marlunnik tunisassiorfeqarpugut, aalisakkat assigiinngitsut ullut tamaasa tikiussuuneqarput aamma avataa tungerput puisinik ulikkaarpoq, Palle Jerimiassen KNR-imut oqarpoq.
Kommuni tungaanit iliuuseqartoqartarpoq
Qimminik paarsinerluttoqarnissaa pinaveersimatinniarlugu, kommuni iliuuseqaraluartoq taassuma eqqaava:
- Soorlu qimmeqarfiit tamaasa imeqarfeqartippavut. Aamma qimminik sissuertoqarpugut. Arlaannik uani takunngitsuuisoqarsimavoq imaluunniit nakkutilliineq arlaanni ajutoorsimavoq, Palle Jerimiassen oqarpoq.
AAMMA ATUARUK Qimmit perlertut 19-it Ilulissani toqunneqartut
- Siunissaq eqqarsaatigalugu arlaatigut iliuuseqartariaqarpugut sukaterilluta, taamatut qimmiminnik paarsinerlussimasut immaqaluunniit inuunermi sinnera qimmeqaqqusaajunnaarsinnaanerannik sukaterisariaqarpugut, Palle Jerimiassen KNR-imut taama oqarpoq.