Qatserisartut uuliakoortoqarnerani iliuusissaannut ilitsersuummik videoliortoqartoq

Kalaallit Nunaanni sinerissap qanittuani imaani avatangiisini uuliakoornermik ukiut tamarluinnaasa pisoqartarpoq. Uulia uumasunut aamma imaani avatangiisinut ajoqusiisumik sunniisarmat uuliakoornermik pisoqarnera ilungersunartuusarpoq.

Taamaattumik imaani uuliakoornermik pisoqartillugu uuliap siaruannginnerani sukkasuumik katersorneqartarnissaa pingaaruteqarpoq.

Avatangiisinut Pinngortitamullu Naalakkersuisoq Kim Kielsen neriuppoq, filmiliaq nutaaq uuliakoornermi upalungaarsimanermut atortunik annerusumik ilisimasaqalernermut iluaqutaajumaartoq, atortut tamakkua nunatsinni sumiiffinni assigiinngitsuni inissisimapput.

Sinerissap qanittuani uuliakoortoqartillugu upalungaarsimanermi atortut qanoq atorneqassanersut aserfallatsaaliorneqassanersullu filmimi takutinneqarput.

Upalungaarsimaniarnermi najukkami qatserisartoqarfinni sulisorineqartut atortuutigineqartullu aallaavigineqarput

Filmiliaq piviusumik sungiusartarnernut taartaasinnaanngitsoq, sulisulli ilinniartinneqarnerannut ilaassasoq, Kim Kielsenip ilanngullugu oqaatigaa.

Avatangiisinut Pinngortitamullu Naalakkersuisoqarfik Kalaallit Nunaata imartaani uuliakoornissamut upalungaarsimanermut akisussaasuuvoq.

Uuliakoornissamut upalungaarsimanermi sulisut atortullu Kalaallit Nunaanni illoqarfinni aqqaneq-marlunni qatserisartoqarfinni inissisimasut aallaaviupput.

Sulisut sungiusimasaat allanngutsaaliorniarlugit nunatsinni sumiiffinni assigiinngitsuni sungiusartitsisoqartarpoq, avatangiisinut naalakkersuisoqarfik tusagassiuutinut nalunaaruteqarluni taama allappoq.