Professori: Nalillit akileraaruserneqarpata akileraarummik appaasoqarsinnaavoq
- Sulinikkut isertitaanngitsutigut tamanna matussuserneqarsinnaakutsoorpoq. Eqqarsaatigeriartigimmi, soorlu nammineq illuutit allallu sulinikkut isertitaanngitsutigut aningaasarsiutit annikitsunnguamik akileraaruserneqartartut.
- Tamakku akileraarutaat qaffalaarneqarpat, taava Kalaallit Nunaata karsianut isertitassat amerlineqassapput, taamaaliornikkullu sulinermi akileraarut allatut aaqqissuunneqarsinnaalissaaq tamatumalu kingunerissavaa nioqqutissiorneq annerusoq suliffissallu amerlanerusut.
Aningaasaqarneq pillugu Siunnersuisoqatigiit siulittaasuat, Torben M. Andersen naliliivoq. Taanna Aarhusip Universitetiani aningaasarsiornermut professoriuvoq.
Torben M. Andersenilu isumaqarpoq, akileraarutip appartinneqarnerani, Nunatta karsiata ukiumut annaasassaat, 70 million koruuniusut pappialat nalillit iluanaarutaannit akileraarusiinikkut matussuserneqakutsoorsinnaasut.
- Taamatut matussusiinermik siunertaqarneq neriunaateqarpoq. Sulili iluarnerussalluni illut nammineq pigisat tuniniarneranni akileraaruserneqartalertuuppata, Torben M. Andersen oqarpoq.
Nunanut allanut naleqqiullugit akileraarusiinerit annertuut pisariaqanngitsut, Torben M. Andersenip naqissuserpaa.
Akileraarutip 1 procentimik appartinneqarnerani nunatsinni inuiaqatigiit akissakinnerit eqqorneqassasut, Siumup siulittaasuata, Aleqa Hammondip aalleqqutigaa.
Inuiaqatigiit akissakinnerit akileraarutip appartinneqarnerani eqqorneqartariaqanngitsut, Torben M. Andersenip oqaatigaa, tassami sulinikkut isertitaanngitsunik aningaasarsiortut tassaakkajummata, akunnattunik annertuunillu isertitaqartartut.
- Akileraarutip allanngortinneqarnerani akissarsiagissaarnerit eqqorneqassappata, tamanna ajoqutissaqanngilaq, Torben M. Andersen oqarpoq.
Aningaasaqarnermut Naalakkersuisup, Maliina Abelsenip akileraarutip appartinneqarnissaanik siunnersuuteqarnermini anguniagaasa ilagaat, inuiaqatigiit akornanni sulerusussuseqalernerunissaq.
Tamanna anguneqassappat, taava 1 procentimik appaaniarneq naammannersoq, Torben M. Andersenimut apeqqutigaarput, taannalu ima akivoq.
- 1 procentimik appaanermi unnuaq qaamanerulersinneqarnavianngilaq. Appaaniarnerup siunertarinerugunarpaa akileraaruseriaatsip ilorraap tungaanut aallartinneqarnissaanik siunertaqarneq aammalu sulerusussuseqalernissamut puilerisaataaneruinnarunartoq.
Aningaasaqarneq pillugu Siunnersuisoqatigiit siulittaasuat, Torben M. Andersen taama oqarpoq.
Naalakkersuisut aningaasanik matussutissanik nassaassappata, akileraarutip 1 procentimik apparneqarnissaa 2013-imi atuutilersinneqariissasoq, Aningaasaqarnermut Naalakkersuisup, Maliina Abelsenip oqaatigisareerpaa.
