Politiit toqutsisoqarsimaneranik pasitsaassaqarlutik ilivermik assaallutik qaqitsisut

Qaqortumi politiit iliveqarfimmi ilivermik sapaatit akunnerata naanerani assaallutik qaqitsipput.
Den afdøde har igen fået fred på sit gravsted i Qaqortoq. Assi © : KNR
Allattoq Jens Thorin
septembarip 17-at 2014 10:24

 Tamatumunnga peqqutaavoq, toqusimasoq pillugu nutaanik politiit ilisimasaqalersimanerat, tassa imaassinaammat toqutaasimasoq.
 
Pineqartoq tassaavoq angut inuusuttoq ukioq manna juulimi toqusoq, taamani ingasappallaamik aanngajaarniutitorsimassangatinneqarluni.
 
Pinerluttoqarsimanerarlugu, politiinut maanna unnerluutiginnittoqarsimalerpoq.
 
Politiit taamaammat iliveq sapaatit akunnerata naanerani assallugu qaqitsippaat, nakorsat, pinerluttoqarsimatillugu misissuisartup aggersagaaasup misissorniassammagu. Taama pisoqarsinanera Kujataani politiit pisortaata, Bent Ole Kleistip uppernarsarpaa.
 
Toqusup timaa manna ilineqaqqereerpoq.
 
Qaqortumi politiit pisortaat, Bent Olsvig Kleist mannakkut annerusumik oqaluttuarsinnaanngilaq, misissuinernit akissutisiassanik utaqqeqqaartariaqarami.