Politiit suliassaat ikileriaateqarput

Nunatsinni politiit ukiumoortumik nalunaarusiaat 2013-imut tunngasoq, ilaatigut Nunatsinni pinerloriaatsinik pinerluttarnerullu ineriartorneranik paasissutissanik imalik saqqummersinneqaqqammerpoq.
Allattoq Elisa Isaksen
apriilip 17-at 2014 17:33
Nalunaarusiami 33-nik quppernilimmi kisitsisit pinerlunnerit suunerannut tunngasut illoqarfinnilu qanoq agguataarneri takuneqarsinnaapput.
 
Pinerluttulerinermik inatsimmik 2013-imi unioqqutitsinerit 4.713-iupput, taakkulu 2012-imut sanilliullugit 600-nik ikileriaateqarput.
 
Inuusuttut pinerlunniartarnerat immikkut misissoraani paasinarpoq, 2012-imi amerlasoorujussooriarlutik 2013-imi ikileriarsimaqisut - allaat ukiuni tallimani aatsaat taama ikileriartigalutik.
 
- Kisitsisilli suli qaffaseqaat, ataatsimoorlunili iliuuseqarnikkut, tassa oqartussat, suliniaqatigiiffiit inuiaqatigiillu ikioqatigiinnerisigut, inuusuttut pinerlunniartarnerisa ikiliartornerat attanneqaannarsinnaassasoq, politimester Bjørn Tegner Bay ukiumoortumik nalunaarusiami allappoq.
 
Inuusuttut pinerluutigisartagaat amerlanerit tassaapput tillinniarnerit aamma pisiniarfinni tillinnerit.
 
Politiilli isumaqarput, inoqatinut pinerlunnerit ajornartorsiutit suli annersarigaat.
 
Taamaalillunimi pinerluttulerinermik inatsimmik unioqqutitsinerit 27 procentii tassaapput nakuusernerit imaluunniit kinguaassiuutitigut pinerluuteqarnerit - tamatumani nakuusernerit 731-ugamik pinerlunnerillu kinguaassiuutinut tunngasut 312-iugamik.
 
Ikiaroornartoq hash 73,7 kiilunik annertussusilik 2013-imi arsaarinnissutigineqarpoq. Tamannalu ukiup siulianut naleqqiullugu pingasoriaammik anneruvoq. Tamatumunngali atatillugu oqaatigineqarluni ikiaroorniutinik allanik sakkortuunik anngiortumik eqquteriakkanik annerusumik arsaarinnissuteqartoqanngitsoq, taamaallaammi kokain 2 grammi Ilulissani arsaarinnissutigineqarmat.