Pissaanilissuit Kalaallit Nunaannit iluarineqarnissartik unammissutigigaat
Sapaatip akunnerata siuliani EU Nuummi ataatsimeersuartitsinera nunatsinni Issittumilu ersarinnerusumik suliaqartutut inissisimanissaminut annerusumik periusissiaaniit aallaaveqarpoq.
Naak ukiut tamaasa 300-400 mio. kr.-it Bruxellesimiit Nuummut pisaraluartut, inuit amerlanngitsuinnaat ilisimassajunnarsivaat EU pingaarutilittut nunatta karsianut taperseeqataasartuunera.
Title
EU giver millioner til uddannelse i Grønland
EU tapiissutigisartakkani pillugit sammineqarnerorusukkuni, taava europamiut allaffissornermik suliallit suleqatitik amerikamiut qiviartariaqarpaat.
Ilisimatusarfimmi Nasiffiup aqutsisua Rasmus Leander Nielsen taama isumaqarpoq.
- USA-p ”soft diplomacy”-mik taasartagarput pikkoriffigisupilussuuaa. Nuummi sinniisoqarfimmik ammaapput Instagramilu taakku pikkoriffigaat. Aamma tapiissutai minnerusut tusagassiuutitigut annertuumik sammineqartarput, naak tapiissutaat ataatsimut isigalugu peanutsitut angissuseqaraluartut, taanna oqarpoq.
Tamannalu EU-p ilikkagaqarfigisinnaavaa.
Issittumut EU attuumassuteqarusulluni pimoorussisoq
USA-p EU-llu ukiut tamaasa Kalaallit Nunaannut tapiissuteqartarnerminnut ilungersuanerat pissaaneqarnissamik sunniuteqarnissamillu tunngaveqarpoq.
EU-mit aningaasat nunatsinnut pisartut
Nunarput EF-imit 1985-imi ilaasortaajunnaareeraluarluni EU-lu ingammik ilinniartitaanermut aalisarnermullu tunngasutigut aningaasaqarnikkut suleqatigiinnermut tunngasunik arlalinnik isumaqatigiissuteqarput.
Aningaasat taakkua nunatta aningaasaqarnerata ullumikkut ilarujussuarai.
Nunatta karsia ukiumut 120-160 mio. kr.-it missaanik aalisarnikkut isumaqatigiissutit assigiinngitsutigut EU-mit pissarsisarpoq.
Tamassuma saniatigut EU-p ukiumut 240 mio. kr.-it missaanniittut Kalaallit Nunaannut aningaasaliissutigisarpai. Aningaasat taakkua ilinniartitaanermut aamma mingutsitsissutaanngitsumik ineriartortitsinermut atugassiaapput.
Ukiumut USA-p nunatsinnut aningaasaliissutigisartagaanik naatsorsuusiaqanngilaq. 30 mio. kr.-it missaanniittut mianersortumik eqqoriarneqarpoq.
Najoqqutaq: Aningaasanut Inatsit
Rasmus Leander Nielsenip oqarnera naapertorlugu nunarput isumalluuterpassuarnik aallerfiusinnaallunilu EU-p killeqarfiata avataaniimmat EU-p Kalaallit Nunannut qaninnerusumik attaveqarnissani soqutigaa.
- Europa isumalluutinik Issittuminngaanneersunik atorfissaqartitsivoq. Taamaammat pilersaarut malillugu EU ukioq manna Nuummi allaffimmik ammaalerpoq, taamaasilluni ulluinnarni Namminersorlutik Oqartussat oqaloqatigisarsinnaanngussavai kiisalu aatsitassat aalisarnermilu pissamaatinut unamminermi ajornannginnerusumik atuuffeqalersinnaanngussalluni, taanna oqarpoq.
Title
EU-Kommissionen vil stå stærkere i Arktis med kontor i Nuuk
Nunatsinni politikerinik suleqateqarnerup tungaatigut EU USA-mit siuarsimanerusoq Leander isumaqarpoq. Tamanna nunatta Bruxellesimi Kalaallit Nunaata Sinniisoqarfimmik ukiut 30-t matuma siorna ammaaneranik minnerunngitsumik peqquteqarpoq.
Aammattaaq ukiuni qulikkaartuni nunarput EU-llu ileqqunngorsimasumik politikkikkut isumaqatigiissuteqartarput, tamannalu aalisarnermut ilinniartitaanermullu nunatta karsianut annertuumik aningaasaliissuteqartitsisarpoq.
- Inatsisartuni kalaallit politikerit EU-mut qaninnerusumik attaveqarnissartik kiisalu EU-mik suleqateqarnertik pingaartitarigitsik oqaatigisaraat takornartaanngilaq, Rasmus Leander Nielsen oqarpoq.
Issittumi USA-p malunnaateqarnerpaaneruinnarnissaanut Kalaallit Nunaat ikiuuttoq
Ukiumut aningaasanik qanoq annertutigisunik USA-p nunatsinnut aningaasaliisarneranik tamakkiisumik allattorsimasoqanngilaq. Kalaallit Nunaata EU-mit tapiissutit pissarsiarisartagaata quleriaataanik annikinnerusumik USA tapiissuteqartartoq mianersortumik eqqoriarneqarpoq.
Illuatungaanilli USA-p Pituffimmi Sakkutooqarfimmi kiffartuussinissamut isumaqatigiissut aqqutigalugu siusinnerusukkut nunatta karsianut tapiissutinik millionilikkaanik qulakkeerinninnikuuvoq. Tamassumunnga aamma pingaarutilittut ilaagunarpoq pisariaqalissappat Kalaallit Nunaata USA-mit ingerlaannartumik illersorneqarsinnaaneranik isumaqarnera.
- Sillimaniarnermut politikki USA-p ataaniippoq. Pisariaqartilerutsigut annaassavaatigut - nangaassutiginagu oqassaguma, Rasmus Leander oqarpoq.
Title
USA giver igen-igen penge til Grønland
Alaska pissutaalluni USA-p Issittumi pissaaneqarnera annertuvoq - inissisimaffik tamanna USA-p attatiinnarusullugulu nukittorsarusuppaa nunat pissaanilissuit allat mattunnerisigut.
Tamanna sammivigalugu nunatsinni ilaatigut takornariaqarnerup ineriartortinneqarnissaanut ukiuni kingullerni amerikamiut aningaasaliisimanerat aamma isiginiarneqassaaq.
- Kinap mattunneqarnissaa siunertaralugu USA-p Kalaallit Nunaanni aningaasaliineranut peqqarniitsutut pissutigitinneqarpoq. Qeqertarsuup Tunuani takornariaqarnermut USA-p ikiuunnissaa pingaaruteqarnersoq pillugu Pentagonip ilorluinnaani aperiguit soqutigiunnanngilaat, Rasmus Leander Nielsen.