Pisat amerlagaluartut pakatsinarput

Kalaallit aalisariutaasa 18-usut, avaleraasartuut 65.149 tonsit, Tunup sineriaani aggustip 28-at tikillugu pisarisimavaat. Tassalu aatsaat taama pisaqartoqartigaluni. Aalisarnermut Piniarnermullu Naalakkersuisoqarfik taama nalunaarpoq.
aggustip 30-at 2014 14:11

Ukioq manna misiliilluni avaleraasartoorniarneq junip 13-anni aallartippoq.

Avaleraasartuut 100.000 tonsit ukioq manna misileraalluni aalisarnermi pisarineqarsinnaasut tamarmiusut suli tassa pisarineqanngillat, tassa 35.000 tonsit suli pisarineqaratik.

Siorna misiliilluni avaleraasartoorniarnermi pisarineqarput taamaallaat 53.000 tonsit.

Piffissami aggustip arfineq pingajuanniit aggustip 28-ata tungaanut avaleraasartuut 400 tonsiniit 2000 tonsinut ullormut pisarineqarsimasut, Kalaallit Nunaanni Aalisarnermut nakkutilliisoqarfiup kisitsisaataasa takutippaat.

Tunumi avaleraasartoorniarnermi aalisakkat Nunatsinni maannamut takussaavallaanngitsut ilaatigut aamma pisarineqartartut, Aalisarnermut Piniarnermullu Qullersaqarfiup nalunaarutigaa. Tassa tunfiskit 21-it pisarineqarsimallutik taakkunannga oqimaannerpaaq 260 kiiluulluni.