Nunanit allanit

Pinerliisoqarnissaa eqqarsaatigalugu upalungaarsimaneq Nunatsinni annertusineqanngilaq

Danmarkimi pinerliisoqarnissaanut politiit upalungaarsimanerat tallimanut immikkortitanik malittarisassaqarput. Parisimi aviisimut Charlie Hebdomut, januaarip arfineq-aappaani pinerliisoqareersorlu, danskit politiivisa 'ulluinnarni upalungaarsimanertik', taanna immikkortoq siullertut taaguuteqartoq, qaffappaat immikkortoq 2-mut, taaguutilimmut 'annikitsumik upalungaarsimanermut'.

Vicepolitiinspektør Viggo Johansen i Nuuk

Allattoq Apollo Jeremiassen, Laura Aggernæs

februaarip 16-at 2015 17:19

Nunatsinnili pinerliisoqarnissaanut upalungaarsimanermik annertusaasoqanngitsoq, Nunatsinni vicepolitiinspektørip, Viggo Johansenip KNR-imut oqaluttuaraa:

- Danmarkimi saassussisoqartorlu upalungaarsimaneq qaffasinnerusumut inissinneqarpoq. Nunatsinnili tamanna qaffanneqanngilaq, taamaattoq Danmarkimi pisut malinnaaffigeqqissaartuarpagut.

- Aamma maani Nunatsinni saassussisoqarsinnaanera politiinit oqaluuserineqarpoq taamatullu tamanna pissagaluarpat qanoq iliornikkut tamanna iliuuseqarfigineqarsinnaanersoq eqqarsaatersorfigalutigu.

Aamma atuaruk Peqqarniisaarniartoqarnera Ahmed Akkarip annilaarutigaa

Viggo Johansen aamma aperaarput, Nunatsinni pinerliisoqarnissaa politiinit naatsorsuutigineqarnersoq, taannali oqarpoq tamanna oqaatigisinnaanagu.

Taamaattorli erseqqissarpaa, Danmarkimi pisunut malinnaanerminni danskit isertortumik politiivi aamma Naalagaaffeqatigiit politiivi attavigineqartuartut.

Tassalu Nunatsinni pinerliiniartoqalernera paasineqariarpat, Naalagaaffeqatigiit politiivisa upalungaarsimanissamut innersuussutaasa malittarisassaat Nunatsinni erngerluni atuutsinneqalernissaat, Viggo Joahansenip oqaatigaa imalu nangilluni oqarluni:

- Upalungaarsimanissaq Naalagaaffeqatigiit Politiivinit aalajangerneqartarpoq, taakkulu Nunatsinni upalungaarsimanissarput manna tikillugu aalajangiiffiginngilaat.

Aamma atuaruk Toqutaasut Danmarkimi eqqaaniarneqassapput

- Tassalu Københavnimi arfininngormat saassussisoqarnerata kingorna Nunatsinni upalungaarsimaneq allanngortinneqanngilaq, tassa suli 'annikitsumik upalungaarsimavugut', tassa tamanna qangali maani Nunatsinni atugarput.

Nunatsinni vicepolitiinspektøri, Viggo Johansen taama oqarpoq, naggataatigullu nassuiaalluni, Nunatta sineriaata tikikkuminnaanera eqqarsaatigalugu, pinartoqartillugu Nunatsinni politeeqarfinnit allanit ikiortissanik erngerluni aggersaaniartarneq ajornakusoortuusarmat illoqarfinni ataasiakkaani politiit amerlassusaat naapertorlugit aaqqiisoqartartoq.