Pihl og Sønip akiliisinnaajunnaarnera Nukissiorfinnut sunniuteqanngilaq
Tassani Pihl & Søn-ip piginneqataaffigisaata islandimeersup Istak-ip, akiliisinnaajunnaarnerup kingorna islandimi naalagaaffiup ingerlataanit landsbank-mit ingerlanneqarlersup, suliassat qularnaveeqqusikkat tamaasa akisussaaffigilerpai.
Nukissiorfiit pisortaanerata Henrik Estrup sapaatip akunnerata siuliani Radioaviisimut oqaatigaa, suliffeqarfik Paakitsup suliarineqarnerata nalaani suliap nalingata 15 procentiinik qunarnaveeqqusiisimasoq- aningaasanngorlugit 85 millioner koruuninik.
- Septemberip aappaani ukioq manna nukissiorfiup Paakitsumik tigusinerata kingorna, isumaqatigiissut malillugu qularnaveeqqut 10 procentimik nalikillineqarpoq, aningaasanngorlugit 57 millioner koruunit missaaniittunngorlugu. Tassaavoq taanna qularnaveeqqut ajornartorsiortoqalissangaluarpat maanna pigisarput, Henrik Estrup oqarpoq.
