Peter Augustinus toqukkut qimaguppoq

Peter Augustinus 69-inik ukioqarluni toquvoq.

Augustinus Fondenimik milliardinik imalimmik pilersitsisuuvoq, taassumalu saniatigut assigiinngitsuni siulersuisunut ilaasortaalluni, ilaatigut Dansk-Grønlandsk Kulturfond-imi, Arktisk Institutimi Kalaallillu Illuutaanni Københavnimiittumi.

Peter Augustinusip Kalaallit Nunaannut asanninnera aningaasaateqarfiup aningaasaliisarnerani erserpoq. Ilaatigut Knud Rasmussenip Højskolia Sisimiuniittoq, Tasiilami meeqqat, Arktisk Institut Det Grønlandske Selskabilu, Ilimmarfik aamma naalagaaffiup aningaaserivissuata Nationalbankenip ilisimatuussutsikkut suliniutaa Nordlige Verdener aningaasaateqarfimmiit tunineqarnikuupput.

Eqqumiitsulianillu saqqummersitsinermi Art Copenhagenimi kalaallit tuniniaaviat Augustinus Fondimit ukiorpassuarni aningaasalersorneqarluni.

Peter Augustinus, 69-inik ukioqarluni toqusoq, nersornaammik Ridder af Dannebrogimik ataqqinarnerpaamik Nersornaammillu sølviusumik nersornaaserneqarnikuulluni.