Arfinilinnik ukiullip, Manuminap Dronning Ingridip Napparsimmaviani kukkunerpassuit ilaginnaanerullu kingunerisaanik toquneranit qaammatit tallimat maanna qaangiupput.

Angajoqqaajusut tamatuma kingornali oqartussanit – naapertuilluanngitsoqarnera nalaassimasartik pillugu akisussaatitsisoqarnissaanut akissutissarsiniartaraluarput.

Ilungersornerli taanna ilaqutariinnut qasunarpallaalerpoq. Taamaammat eqqartuussissuserisumik peqqinnissaqarfimmut saqitsaatigisaminnik ikiuisussamik nassaarsimallutik, Manuminap ataataa, Frederik Olsen oqarpoq:

- Politiinut nakorsaanermullu nukingisaarinermut piffissarujussuaq atorparput. Naak piffissaq panitsinnik annaasaqarnitsinnik aliasorujussuarnitsinnik suliaqarfigisinnaagaluarlutigu. Ullut tamaasa maqaasivugut, taanna oqarpoq, nangillunilu:

- Akissutissarsiniarsarivugut, kisianni inatsisilerinerit inatsisillu aporfigeqattaarpagut. Taamaammat ikinngutitta ilaquttattalu eqqartuussissuserisussarsiornitsannik kaammattuuteqarfigaatigut. Taamaaliorpugullu, taanna oqarpoq.

Naapertuilluarfigitinneq akeqartoq

Taamaammat ilaqutariit piukkunnartumik eqqartuussissuserisussarsiulerput. Tamannalu piffissamik atuiffiuvoq.

Naggataanilu tamarmik assigiimmik sammiveqalerput. Eqqartuussissuserisumillu napparsimasut naammagittaalliutaat pillugit sulianik immikkut ilisimasalimmik, namminnerlu nalaataminnut assingusunik sulianik arlalinnik ingerlataqareersimasumik nassaarput.

Akunnaffeqartorli, Frederik Olsen oqarpoq:

- Eqqartuussissuserisup sulisinnissaa akisoorujussuusoq paasinarsivoq. Taakkununnga suliaq tamaat tunniutissagutsigu akiliutissaq ukiumut isertitatsinnit annertunerulersinnaavoq, taanna oqarpoq.

Angajoqqaajusut aningaaserivimmit atorniarniarlutik isumaliuteqarsimallutik Frederik Olsen oqarpoq. Suliarmi suliaritikkusuppaat. Taassumammi oqarnera naapertorlugu ajugaassanerlutik apeqqutaanani – qaqugu ajugaassanerlutik apeqqutaavoq.

Taava ikinngutitta ilaquttattalu Facebookikkut aningaasanik katersiniarsinnaasugut siunnersuutigaa.

Frederik Olsenip tamanna iluarivallaanngikkaluarlugu naggataani katersinialiinnarpoq. Taakkumi eqqartuussissuserisumut siumut akiliutissap affaa katersorsinnaasimavaat.

Nunarsuarmit tamarmit inussiarnisaarfigineqartut

Ilaqutariit eqqartuussissuserisumut akiliutissamut ikioqqullutik Facebookikkut tallimanngormat kingullermik katersuinialerput – tamatuma kingorna sukkasoorujussuarmik ingerlaalerpoq.

- Saqqummersinneranit – minutsimit siullermik – toortarneqaqattaarpoq. Tallimanngorneq ulloq naallugu. 10 koruunimit 5000 koruunimut tunniussisoqarpoq. Tupinnaq, tupinnaq. Nuannaarnerup pianik qiaannarpugut, taanna oqarpoq, nangillunilu:

- Atit – tusarsimanngisaannakkakka – tapiissuteqarput. Nunarsuarmit tamarmit tapiissuteqartoqarpoq. Attortingaatsiarpugut. Amerlasuut uani attortissimasut taperseerusuttullu paaseriataarparput.

Maanna – katersilernermit sapaatip akunnera qaangiutilaartoq – eqqartuussissuserisumut akiliutissamut 42.500 koruunit katersorsimavaat. Ilaqutariillu katersinermik aallartitsigamik ulloq taanna eqqartuussissuserisumut siumut akiliutissap akilersinnaalereersimavaat, suliami allagaatit tamarmik eqqartuussissuserisumut suliamik aallartitsereersumut nassiunneqareerput, taassumalu periarfissat pitsaasut oqaatigaa.

Qanittumiit ungasissumiillu – ikiuinerujussuaq – ilaqutariinnut isumaqangaatsiarpoq.

Isumalluarsinnaanngoqqitsitsivoq, taakku – Manuminamut atatillugu Dronning Ingridip Napparsimmaviani sulisut suliarisaat kukkunerusoq pillugu sorsuutiginneqqinnissaminnut maanna piareersimalersutut misigisimalerput:

- Peqqinnissaqarfik suliamit matumani aniguisinnaanngitsoq maanna paasivarput. Kikkut tamarmik naapertuilluarnermik kissaateqarnerput kissaatigaat. Kikkut tamarmik peqataasut misigisimavugut. Kikkut tamarmik naapertuilluarfigineqarnissatsinnut tapiissuteqarusupput.

Eqqartuussissuserisup peqqarniitsumik sumiginnaasoqarnera pillugu unnerluutiginnittoqarsinnaanersoq suliarlu eqqartuussivitsigoortinneqarsinnaanersoq maanna nalilersussavaa.