Partii Inuit siunnersuutaat akuerineqarsimanngillat

Partii Inuit Inatsisartut upernaakkut ataatsimiinnissaannut siunnersuutiminnik ataasiinnarmilluunniit oqaluuserisassanngortitassaminnik akuerineqarsimanngillat. Partiip Inatsisartuni ilaasortaatitaata Randi Brobergip siunnersuummini ilusissaa pillugu piumasaqaatini ataasiinnarluunniit akuerineqarsimanngilaq. Sermitsiaq.AG-p nittartagaani tamanna atuarneqarsinnaavoq.

Inatsisartut siulittaasoqarfiata upernaamut ataatsimiinnissamut oqaluuserisassatut siunnersuutit marlunngormat naammassivaat.

- Ilisimatinneqarpugut Randi Brobergip siunnersuutaani ataasiinnarluunniit oqaluuserisassanngortinneqarsimanngitsoq, siunnersuummini ilusissaa pillugu piumasaqaatit eqqortissimanngimmagit, Partii Inuit siulittaasuat Nikku Olsen Sermitsiaq. AG-mut oqarpoq.

Inatsisartut siulittaasuat Lars Emil Johansen Radioaviisimiit attaveqarfigisimavarput. Eqqartukkavullu uppernarsarpai, erseqqissarlugulu Partii Inuit kisimik itigartinneqarsimanngitsut. Partiilli tamarmik apeqquteqaatiminnik itigartinneqarsimapput, siulittaasoqarfiup nalilermagit piumasaqaatinik eqqortitsinngitsut.

Piumasaqaatit siunnersuutit allaffissornikkut aningaasaqarnikkullu kingunissaannik ersersitsisussaapput, tamakkuuppullu ajornartorsiortitsisut.

Partii Inuit siulittaasuat Sermitsiaq. AG.mut oqarpoq:

- Isumaqarpugut Inatisartunut ilaasortat aningaasaqarnikkut naatsorsuutit suliassaringikkaat. Inatsisartunut siunnersuutit aningaasartaat Naalakkersuisoqarfiit suliarisassavaat.

Inatsilli taamaanngilaq, taamaattumik isuma taamaattoq Lars Emil Johansenimit taperserneqanngilaq.

- Inatsit nuannarinngikkaluaraanniluunniit malittariaqarpoq. Minnerunngitsumik inatsisilerisunit, Inatsisartut siulittaasuat erseqqissumik nalunaarpoq.

Inatsisartut kingullermik ataatsimiimmata Partii Inuit 16-inik siunnersuuteqarpoq, sisamaannaalli siuttaasoqarfimmit akuerineqarlutik.