Partii Inuit siunnersuutaat akuerineqanngitsooqqittut
Partiimi, partiini kisiartaalluni, oqaluuserisassanik ukiaq manna ilanngussinngitsoormat.
Inatsisartuni suleriutsit Inatsisartuni partiit ilaasortaatitaqartut minnersaannit ajornakusoortinneqarput.
Inatsisartummi upernaaq ataatsimiinneranni oqaluuserisassanik ilanngussaqanngitsoorput, soorlu aamma siorna ukiakkut siunnersuutaannit aqqaneq-marluusunit sisamat taamaallat akuerineqarnikuusut. Ukiaaneranilu ataatsimiinnissami Randi Brobergip siunnersuutai siunnersuutinut ilusissanut piumasaqatiinik naammassinninngimmata aamma akuerineqanngillat:
- Soorunami malippagut uagut isumagut malillugit inatsisartunut oqallisigineqartartunut allanut sanilliullugit allaanerussuteqanngillat, Nikku Olsen oqarpoq.
Partii Inuit Inatsisartut suleriusaata allanngortinneqarnissaanut siunnersuuteqaraluarpoq Inatsisartunut siunnersuutit kalaallisuinnaq nassiunneqartalernissaat anguniarlugu. Kisianni tassa siunnersuut oqaluuserineqartussatut akuerineqanngilaq.
AAMMA ATUARUK Partii Inuit siunnersuutaat akuerineqarsimanngillat
Nikku Olsenili malillugu tamanna partiip siunnersuutinut piumasaqaatinik naammassinnittunik siunnersuuteqarsinnaanginneranik patsiseqanngilaq. Taannami isumaqarpoq atorfilittat politikkikkut sulinermi oqartussaavallaartut:
- Oqaatigisareerparput atorfillit aqutsisuussanngillat, politikerit nunatsinni aqutsisuussasut, taanna qisuariaatiginikuuarput. Ersarippallaaqimmat atorfillit nunatsinni aqutsinnerat sakkortoorujussuusoq. Politikkikkut oqallinnikkut pissutsit allanngortinneqartariaqarput, Nikku Olsen oqarpoq.
Partii Inuit sunniuteqarpallaarsimanngilaq
Partii Inuit aallartinnerat ataatsimut isigalugu sakkortusimavoq, partii politikkikkut sulinermini sunniuteqarpallaarsimanngilaq, naak siorna 1,1 million koruuninik aningaasartuuteqaraluaraluni:
- Aamma oqaatigilaarlara una tupigusuutigisaleratsigu massakkut tusagassiorfiit isummersuleraangatta ilanngussinngisaannarmata. Aatsaat soorlu taama ittunik pisoqaleraangat ilanngussiniartarnersi allaanngilaq ajortussat kisimik suliarineqartut, Nikku Olsen oqarpoq.
Partii Inuit 2013-imi 902.500 koruuninik tapiissutisivoq.
