Pan-Arctic Vision Nuummi oktobarimi aaqqissuunneqassasoq

Pan-Arctic Vision Nuummi oktobarip aqqaneq-aappaani aaqqissuunneqassaaq.

Pan-Arctic Visionilu suunersoq eqqaamalluanngikkukku taanna tassaavoq issittumi nipilersornermik unammisitsineq Eurovisionimut assingusoq. Norgemi Vadsømi siorna aaqqissuunneqaqqaarpoq, kalaallillu nipilersortartut NUIJA issittormiorpalaarnerpaatut ajugaavoq.

Nunarpullu ukioq manna aaqqissuussisuusussatut aamma ajugaavoq. Taamaammat Pan-Arctic Visionip aappassaanik aaqqissuunneqarnera illoqarfiit pingaarnersaanni kulturikkut illorsuarmi Katuami oktobarip qiteqqunnerani aaqqissuunneqassaaq.

- Isumaqarpunga pitsaasuusoq. Nunarput nuna avannarlerni nunanut allanut takutissavarput, Katuap pisortaa, Ivaaq Kriegel oqarpoq.

Pan-Arctic Vision eqqumiitsuliornikkut suliniutaallunilu eqqumiitsuliorneq atorlugu Nunanik Avannarlernik ataatsimoortitsiniutaavoq. Unammisitsineq Eurovisionimut attuumassuteqanngilaq. Issittumi inuit – nunap inoqqaavi inoqqaajunngitsullu ataatsimut – erinarsoqatigiinnissaat issittormiullu ataatsimoornissaat siunertaavoq.

- Ajugaasumik toqqaanissaq siunertaavallaarani Issittumi ataatsimoornermik pilersitsinissaq pingaarneruvoq, Amund Sjølie Sveen KNR-imut siorna oqarpoq. Taanna Norgemi aaqqissuussamik pilersaarusiortumi Nordtingimi eqqumiitsuliornermi siulittaasuuvoq.

Nipilersortartut ammasumik periarfissaqartut

Suliniaqatigiiffiarannguuaq suliniuteqartuuvoq, taakkulu suleqateqarnissamik pisariaqartitsilluinnartuupput. Maannalu Pac-Arctic Visionip aappaassaanik aaqqissuunneqarnissaanut aningaasassarsisoqaqqippoq.

KNR-ip Pan-Arctic Visionimi aaqqissuussisut oqaaseqartinniarsarai, tamannali suli periarfissaanani.

Nipilersortartuuguit maajip 15-iat nallertinnagu nalunaarsinnaavutit. Pan-Arctic Vision Alaskamit, Canadami Yukonimit Nunavummit, Nunatsinnit, Islandimit, Savalimmiunit, Norgep avannaanit, Sverigep avannaanit Finlandillu avannaanit peqataasussanik maanna ujartuileruttorpoq.

- Uanga nammineq qilanaarpunga. Nipilersortartut peqataarusuttut ammasumik nassiussinissamut maanna periarfissaqarput. Tamanna nipilersornermik ineriartortitsinermut aamma tapersiissutaavoq, Ivaaq Kriegel oqarpoq.

- Nunatta Nunani avannarlermiut sinnerinut takutinnissaa pingaaruteqarpoq. Suleqatigiissinnaanermik unnunnillu aaqqissuussisinnaanernik takutitsinissaq aamma pitsaasuuvoq. Ussassaarutaalluarpoq.

Pan-Arctic Vision KNR TV-kkut oktobarip aqqaneq-aappaani arfininngornermi toqqaannartumik aallakaatinneqassaaq.