Paddy Kelly tusarnaartitsilluarpoq
Paddy Kelly, nipilersoqatigiinni ilaqutariinni The Kelly Familykkunni qatanngutigiinni akulliusoq, Katuami Hans Lyngep Inersuaani marloriarluni ippassaq appisimaarpoq.
Allattoq Sara K. Jakobsen
Katuap inersuaa inunnik ulikkaavippoq. Nunarsuaq tamakkerlugu ukiorpassuarni tusarnaartitsisareersorlu kiisami Nunatsinni nuannarinittut tusarnaarnissaminnut periarfissinneqarput: Paddy Kelly tikimmat.
AAMMA ATUARUK Kellymut isissutissat pilerngullugit nunguppaat
Sukkut tamaana arnat iggoraarsoortorlutik nilliapput. Erinnat ilisimaneqarluartut soorlu "An angel" aamma "One More Song" tiguaangaatsiarput, tusarnaarianillu erinarsoqataaffigineqarlutik.
Erinarsortartullu tusarnaariat ornigarlugit assammeqattaarmagit tusarnaariat pikkusoqaat.
Tusarnaariat erinarsoqataasut
Nipilersukkat appitai tamarmik ersaattaanneqartarput, appisimaagaali ataaseq, "Amazing Grace", immikkuullarissumik misigineqarpoq.
Paddyp appikkaalu tusarnaariat kalaallisut erinarsulerpaat, "Eqqissisinnga aat" atorlugu. Taava erinarsortartoq alutorsaqaluni nipaaruppoq tusarnaariartunilu tusarnaalerlugit.
Eqalunnguaq Kristiansenip, arnaatini ilagalugu koncerteriarsimasoq, misigisaq ilisarnarsisillugu oqaluttuaraa:
- Misigisaq alutornarlunilu tupinnaqaaq. Inuit qullilillutik erinarsortut, saninnilu arnaatiga qiasoq, Eqalunnguaq Kristiansen, KNR-imut oqarpoq.
Paddy Kellyp tusarnaartitseqattaarluni Europami angalaarnini Danmarkimi nangissavaa.
Paddy Kellylli Nunatsinnut tikeraarnera kingulliussagunanngilaq. Tusarnaartitsinerminimi nuannarinnitsini neriorsorpai tikeqqikkumaarluni.