Paasisaanissartik ernummatigalugu peqataajumajunnaartut
Taamaattoqarnera unitsinniarneqarpoq, taamaattumik ukiormanna arsaalluni pissartanngorniuttoqarnerani hashimik pujortartartunik misissuisoqartussanngorpoq.
Taama aalajangertoqarnera ingerlaannartumik sunniuteqarpoq, arsaattartummi arlallit paasisaanissartik ernummatigalugu unammeqataajumajunnaartut nittartakkami sermitsiaq.ag-mi allaaserineqarpoq
Arsaattartut akisussaaffimmik tiguseqataapput
Kalaallit Nunaanni Arsaattartut Kattuffianni siulittaasup John Thorsenip tamanna nuannaarutigaa:
- Imatut naliligassaavoq, una, tusarliussarput taavalu ingerlatiligarput aamma paasineqarluni klubbininngaanniit tiguneqarsimasoq. Taavalu arsaattartut ataasiakkaat akisussaaffimmik tiguseqataallutik, immaqa klubbiminnik innarleerusunnatik, taamatut aalajangertariaqalersimasut.
- Taakkua tusaatissatut tiguagut, aamma soorunalimi nersualaarpagut taamatut akisussaaffimmik tigusillutik unneqqarissaarsimammata, John Thorsen oqarpoq.
AAMMA ATUARUK Politikereq: Meeqqat atuarfianni atualerlaanut hashi pillugu paasisitsiniaasoqassaaq
Taanna isumaqarpoq taama suliniuteqarneq pisariaqartinneqarluinnartoq.
- Pissusissamisoorsoraara, aamma taanna klubbiminnik innarleerusunnginnerat tassani erserami, taamaalillutik akisussaaffimmik tigusisutut isigalugit. Iluarisimaarpara taamatut aalajangersimanerat, John Thorsen oqarpoq.
Inuusuttut marlunnik qinigassaqarput
Taassuma neriuutigaa taama suliniuteqarnikkut timersorneq arsaannerlu pingaartinneqarnerulissasut, timersornermullu tunngassuteqanngitsut pingaartinneqaratik.
- Massakkut malunnarpoq eqqarsaatissiisorujussuusimavugut, taavalu aamma tassa uagutsinnut assorujussuaq nuannaarutaassaaq.
- Inuusuttut marlunnik qinigassaqartutut immaqa isigalutik arsaanneq qinertalerpassuk, taavalu taanna ikiaroornartumik atuiniarneq unitsillugu, John Thorsen, Kalaallit Nunaanni Arsaattartut Kattuffianni siulittaasoq oqarpoq.
