Ozoni silaannarmiittoq issunerulersimallunilu aalaakkaasunngorsimasoq
Ozoni silaannarmiittoq issunerulersimallunilu aalaakkaasunngorsimasoq, ilisimatuut misissuineranni paasineqarsimasoq, Naalagaaffiit Peqatigiit silap pissusia pillugu ataatsimiittartoqatigiivisa oqaatigaat. Aviisi Politiken taama allaaserisaqarpoq.
Gassit silaannarmik kissakkiartortitsisartut CFC-gassinik taaneqartartut atorneqarnerisa killilersimaarneqarnissaat pillugu nunat tamalaat Montreaulimi 1987-imi isumaqatigiissutaat pissutaalluni matumani siuariartoqartoq, ilisimatuut oqaatigaat.
Ilungersuuteqarneq ilinniarfigineqartariaqarpoq
Ozonip annikilliartunnginnissaanut pillugu ilungersuuteqarneq ilinniarfigineqartariaqartoq, silasiortut nunarsuarmi kattuffissuata WMO-p qullersaata Michel Jarraudip oqaatigaa:
- Ozonip annikilliartunnginnissaa pillugu nunat tamalaat akornanni ilungersuuteqarneq avatangisinut iluaqutaassaaq. Silallu pissusiata allanngoriartornerata akiorniarneqarnissaanut ilungersuuteqarnerunissatsinnut kaammattuutitut isigisariaqarluni, Jarraud, Politikenimut oqarpoq.
AAMMA ATUARUK Ozoni aatsaat taama innarlerneqartigaaq
CFC-gassinik atuinerup killilersimaarneqarnissaa pillugu isumaqatigiissusiortoqarsimanngikkaluarpat, inuit ammikkut kræftertut 2030-mi 2 millioninik amerleriarsimassagunaraluartut, Naalagaaffiit Peqatigiit nalunaarusiarisimasaanni uppernarsarneqarnikuuvoq.