Orpippassuit ikuallannerat ICC-p ataatsimeersuarfissaanut siaruaakkiortortoq

Canadami Nordvestterritoriami orpipassuarnik ikuallattoornerit ukiormanna amerlaqaat.
juulip 17-at 2014 05:02

Nordvestterritoriami orpippassuit 170-it missaaniittut maanna ikuallapput. Aatsaallu taama orpippassuarnik ikuallattoqartigaaq. Amerlanersaat territoriap kujasinnerusortaaniipput, maannali aamma territoriap avannarpasinnerusortaanut Inuvialuit nunaannut siaruaakkiartulersimapput.

Illoqarfiup Inuviup, ICC-p sapaatiuppat ataatsimeersuarfigisassaata eqqaani, maanna ikuallannerujussuit marluk pipput. Inuvimmi akunnittarfiup Nova Innip pisortaa Brody Lambe Radioaviisimut oqarpoq, ikuallannerit taakku marluk Inuviup illoqarfittaanut ima qanitsiginngitsut Issittumit tamarmit peqataajortortorpassuarnut sapaatit akunnerani uani tikerartussanut ulorianartorsiortitsisinnaassallutik.

Sermersuarmut uumasunullu sunniuteqarput

Ikuallannerpassuit silap pissusiata allanngoriartorneranik toqqaannartumik peqquteqarnersut imaluunniit allanik peqquteqarnersut ilisimaneqanngilaq. Radioaviisimili qanittukkut oqaluttuarisatsitut, Canadami orpippassuit amerlaqisut ikuallannerisa paaliornerat nunatta sermersuanut anngussimavoq sermersuarmillu ukiormanna sukkasuupilussuarmik aakkiartortitseqataalersimalluni.

Aviisi Globe and Mail naapertorlugu, ikuallannerpassuit Canadap issittortaanut annertuumik kingunerlutsitsisinnaapput. Pingaartumik tuttoqassutsimut, taakkumi neriniarfigisartagaannut sunniuteqarsinnaammata.

Aammattaq ikuallannerit nunamut qeriuaannartumut sunniuteqarsinnaapput, taannami maanna aakkiartulersimavoq sumiiffinnilu arlalinni aqquserngit iluarsaanneqartariaqalersimallutik.