Sulisitsisut Peqatigiiffiata GA-p siornatigut erseqqissaatiginikuuaa siunnersuut isumaqataaffiginngikkitsik, tamanna suliffeqarfinnut namminersortunut, pingaartumik suliffeqarfinnut minnerusunut, aningaasartuutaavallaassaqimmat. Kultureqarnermulli Naalakkersuisoq Mimi Karlsen Naalakkersuisut sinnerlugit isornartorsiuinermut akissuteqarpoq.

- Naleqartittorujussuuarput, kalaallisut oqaasillit amerlanerussuteqarluartut oqaatsitik namminneq atorlugit pinngitsooratik paasitinneqarlutillu aammalu isumaqatigiissutigineqartunik assigiinngitsunik pisassaqartillutik namminneq oqaatsitik atorlugit paasitinneqarnissaat pingaaruteqartutut isigigatsigu, Kultureqarnermut Naalakkersuisoq Mimi Karlsen oqarpoq.

GA-p siunnersuummut illuatungiliilluni oqaaseqaammini ilaatigut oqaatigaa suliffeqarfiit ingammik minnerit unammillersinnaassusiat eqqorneqassasoq, Kultureqarnermullu Naalakkersuisoqarfik inatsisissatut siunnersuummut oqaaseqaammi ilaatigut ima oqarpoq:

"Allannguutissatut siunnersuut naapertorlugu ataatsimut isigalugu nioqqutissat sullississutillu nuna tamakkerlugu suliffeqarfinnit ingammik mikinernit neqeroorutigineqartut akitsornissaat naatsorsuutigineqarsinnaavoq, taamatullu aamma nunatsinni innuttaasut inuuniarnermut aningaasartuuteqarnerulernissaat."

Siumut suliffeqarfinni tamani pilerisaarutit taamatuttaaq atuisunut allakkat suulluunniit nassiunneqartartut pinngitsooratik aamma kalaalllisut allagartaqartalernissaat pillugit Naalakkersuisut siunnersuuteqaqqullugit peqquneqarnissaannik Inatsisartut aalajangiiffigisassaattut siunnersuut 2010-mi ukiakkut saqqummiuppaat.

- Qallunaat oqaasii atorlugit piseqqusaarusiorsinnaaguni, kalaallit oqaasii atorlugit  piseqqusaarusiornissaminut sooq akissaqassanngila? Akit tamarmik assiigipput. Qallunaat kalaallilluunniit oqaasii atorneqarnersut apeqqutaanngilaq, Malik Berthelsen Siumut sinnerlugu oqarpoq.

- Isumaqarpunga nunatta avataaninngaanniit naleqqussartarnerput illuanut saatittariaqaripput, nunatta avataaninngaanniit suliffeqarfiit takkuttut nunatsinnut nunattalu inuinut naleqqussartarnissaat massakkuminngaanniit pissusissamisoortutut isigineqalertariaqarpoq. Kalaallisut oqaatsitta annertunerusumik atorneqalernissaat kissaatigineqartillugu ajornartorujussuartut pisinnaanngitsutullu oqaatigineqartarmat tupigusuutigisarpara, Siumup politikkikkut oqaaseqartartua Malik Berthelsen oqarpoq.

Suliffeqarfiit Oqaatsinut politikkimi aalajangersakkanik unioqqutitsisut akiliisitaasinnaapput.

Siunnersuutip marsip 13-iata tungaanut tusarniaassutigineqartup, amerlanerussuteqartunit Inuit Ataqatigiinnit, Siumumit Atassumiillu upernaaru ataatsimiinnermi tapersersorneqarnissaa naatsorsuutigineqarpoq.