Olsvig: Nunarput akisussaaffimmik anginerusumik tigusivoq

KØBENHAVN: 2011-mi Folketingimut qinersinerup ullua nalerorpiarlugu, Sara Olsvigip (IA) Folketingimi ilaasortaaffini sinniisussaminut Johan Lund Olsenimut pisortatigoortumik ullumi tunniutissavaa.

Kalaallit Nunaata Naalagaaffeqatigiit politikkimik ingerlatsinerani Nunatta naligiissumik peqataatinneqarnissaanik ukiuni pingasuni ilungersorluni sulinerup kingorna tamanna pisussanngorpoq, Sara Olsvig KNR-imut oqarpoq. Tamanna suliassaqarfinnut danskinit akisussaaffigineqartunut aamma atuuppoq, soorlu assersuutigalugit nunanut allanut illersornissamillu suliassaqarfiit.

- Isumaqatigiinniarnerni toqqaannartumik peqataanissara assut pingaartittarpara (…). 2011-mi qinersinerup kingorna ataatsimiititaliat ilaasortaaffigilissallugit iluatsitakka, qinigaaffiullu sinnerani ilaasortaaffigisassavut, akisussaaffimmik naligiinnerulluta kivitseqatigiinnissatsinnut aqqutissiueqataapput, Sara Olsvig KNR-imut oqarpoq.

AAMMA ATUARUK Johan Lund Olsen Folketingimi ilaasortanngussaaq

Taanna aamma isumaqarpoq, Kalaallit Nunaat ukiuni kingullerni pingasuni akisussaassuseqarnerullunilu Naalagaaffeqatigiit politikkiannut sunniuteqarnerusimasoq, ilaatigut Folketingip nunanut allanut tunngasunut ataatsimiititaliaanut Illersornissamullu ataatsimiititaliaanut Nunatta ilaasortaaffeqarneratigut.

- Suliassaqarfiit naalagaaffiup ataaniikkaluarpataluunniit akisussaaqataavugut. Nunatsinni immaqa tamakku aviisitigut sammineqartorsuunngikkaluarput, sammisalli pingaarutillit eqqartorneqaleraangata peqataasarpunga isumarpullu apuuttarlugu, Sara Olsvig oqarpoq.

Danskit politikeriinik tinnersaasariaqarsimavoq
Ilaqutariit inatsisitigut inissisimanerat, puisinik nioqqutissiornermi suliffissuaqarneq, illersornissamut tunngasut aammalu Nunatsinni inatsisinik atortitsinermut eqqartuussiveqarnermullu tunngasut, Sara Olsvigip sunniuteqarfiginerpaavai.

Danmarkimi aningaasanut inatsisissaq pillugu siorna isumaqatigiinniartoqarmat Kalaallit Nunaanni eqqartuussivinni suliassanik kinguaattoorutaasunut 20 mio. koruuninik ilassutitut aningaasaliisoqarnissaa iluatsinneqarpoq. Danmarkip suliassaqarfimmik immikkut isiginiaqanngippat, danskit naalakkersuisuisa aningaasanut inatsisissatut siunnersutaata akuerinnginnissaanik sioorasaaruteqarnikkut tamanna anguneqarpoq. Tamannalu anguneqarpoq, naak Kalaallit Nunaanni eqqartuussiveqarneq Danmarkip suli akisussaaffigigaluaraa.

Danskimmi politikeriisa namminersorneq pillugu inatsisip qanoq imaqarneranik eqqaasittuarnissaat suli pisariaqarpoq, Sara Olsvig isumaqarpoq.

- Arlaleriarlunga oqaatigeriikkattut, danskit politikerii suliassaqarfiit taakku ilaannut tunngatillugu ilatsiinnarpallaalaarsorinarput. Taamaammat nukippassuit atorlugit danskit politikeriinik tinnersaasariaqarsimavugut.

Namminersorluni oqartussaaneq illugiilluni isumaqatigiissutigineqarpoq
Paarlattuanillu namminersorneq pillugu ataatsimoorluni isumaqatigiissummut tunngatillugu, Kalaallit Nunaat aamma naammassiniagassaqarpoq, Olsvig isumaqarpoq.

- Maanna ikaarsaariarfimmiippugut, tamattalu namminersorneq pillugu isumaqatigiissummi anguniagassatut siunnerfigisatta angunissaannut ilungersorluta sulisariaqarpugut.

- Namminersorneq pillugu isumaqatigiissut ataasiinnarmit pinnani, illuatingeriinnilli isumaqatigiissutaavoq, tamannalu Nunatsinni Danmarkimilu puigorneqaqqajaarsartoq isumaqarpunga.

Sara Olsvigip Inatsisartuni sulinini Inuit Ataqatigiinnilu siulittaassuuffini aallunneruniarlugit Folketingimi ilaasortaaffini tunniuppaa.