Ole Dorph: Suliffissuup tusaamanerlugaanera sulisussaaleqinermik tunngaveqarpoq
- Upernavik Seafoodip tusaamaneqarnera ima ajortigaaq allaat suliffigineqarumajunnaarsimalluni, ajornartorsiutip qitia tassaniinnguatsiarpoq. Tatigeqatigiinneq aallaavigalugu sulineq aallartittariaqarparput. Avannaata aviisiani Tamanut-mi atuarneqarsinnaasutut Upernavik Seafoodip innuttaasut akerartortutut pigunigit suliffik taamaattoq taava kia inuup suliffigiumassallugu soqutigissavaa?
Qalerallit suliareqqitassanngorlugit nassiunneqartarneri unitsillugu nunatsinni suliarineqartalernissaannik Qaasuitsup Kommuuniata inuussutissarsiorneq pillugu ataatsimeersuarnermini kissaatigisimavaa, Upernavik Seafoodilli pisortaa Flemming Andersen ippassaq oqarpoq sulisussaaleqineq ajornartorsiutaajuartillugu qalerallit suliareqqitassanngorlugit nassiunneqartarnerat allanngortinneqarnavianngitsoq.
Ole Dorph isumaqarpoq Upernavimmi suliffissaaleqisut ikilisinneqassappata tatiginninneq uterteqqinneqaqqaartariaqartoq, namminnerlu innuttaasunik suleqateqarluarnermikkut Upernavik Seafoodimut aqqutissiuussisuusinnaasutut isigaaq.
- Inuit Upernavik Seafoodimut sulilersinnaanissaannut kajungernerulersinneqartariaqarput, taannaana amigaataasoq. Suliffik taanna minnerpaamilluunnit soqutigineqanngilaq, tatigineqanngilaq kajungerineqarnanilu, taamaattumik ajornartorsiut taanna qaangersinnaagutsigu suliffinnik amerlasoorujussuarnik 100-t missaanniittunik pilersitsisoqarsinnaagaluarpoq.
Flemming Andersenip Ole Dorphip oqariartuutaa apeqquserpaa, oqarporlu namminneq nunatsinni sulilluarnerpaanik sulisoqarlutik, matumanilu sulisut aalaakkaasut ikippallaarnerat kisimi ajornartorsiutaasoq, sulisussallu amigaatigisatik pissarsiariniarneranni kommuuni akerlilersueqinani ikiuukkuni pitsaanerussagaluartoq.
Aamma isumaqarpoq, sulisut taarseraannerat suliffimmi ajornartorsiortoqarneranik peqquteqanngitsut.
- Aalisartunik suliffissuarmilu sulisunik suleqateqarluarpugut, arlaanillu ippigisaqartoqaraangat oqariartornissamut tunuarsimaartoqarneq ajorpoq, Flemming Andersen erseqqissaavoq.
Qaasuitsup Kommuuniani borgmesterip Ole Dorphip Upernavik Seafoodimi pisortaq Flemming Andersen ataatsimeeqatiserissallugu oqarpoq, Flemming Andersenilu piareersimanerarpoq.