Nuup golfertarfiani siullerpaamik hole in one-rtoqarpoq
Nuuk Golf Klubip oqaluttuarisaanerani, maanna ukiuni 14-ini sivisussuseqalersumi, siullerpaamik periarnermi ataatsimi arsaaraq putuaqqamut inissinneqarpoq, hole in one-rtoqarluni. Taamaaliortoq tassaalluni KNR-imi tusagassiortoq, Apollo Mathias Jeremiassen. Taassuma tanngassimaarutigisinnaanngorpaa, Nuummi golfernermi siullersaalluni hole in one-rnini.
Nuuk Golf Klubip pisortatigoortumik unammisitsinerani, periarnermi ataatsimi arsaaraq putumut pippat, taamaaliortoq Grønlandsbankenimit aningaasanik 10.000 koruuninik akissarsiaqartinneqartussaavoq. Apollo Mathias Jeremiassenili akissarsitinneqassanngilaq, tassa pisortatigoortuunngitsumik unamminermi hole in one-rami.
- Taamaakkaluartoq nuannerpoq, takusinnaallugu arsaaraq qaqortoq greenip tungaanut pitsaalluinnartumik silaannakkoortoq tamatumalu kinguneranik arsaaraq putumut nakkartoq paasillugu, nuannaarneq nalissaqanngilaq, Apollo Mathias Jeremiassen oqaluttuarpoq imalu nangilluni.
- Ajoraluartumilli tassa aningaasanik 10.000 koruuninik pissarsisinnaanngilanga, tassa pisortatigoortuunngitsumik unamminermi taama iliorama, Apollo Mathias Jeremiassen taama naggasiivoq.