Nuummi suliffissaaleqisut akornanni avataaneersut amerlaqaat
Illoqarfiit pingaarnersaanni misissuinerit takutippaat, tassani suliffissaaleqisut arfinileriaataat – imaluunniit 15,6 procentii – ukiup kingulliup ingerlanerani kommunimut nuussimasut. Kisitsisit taakkua naapertorlugit tassa kommunimi innuttaalersimasut 200-nit amerlanerusut pisortanit isumagineqalersimapput.
Kisitsisit taakkua suliffissaaleqinerup akiorneqarnissaanut Namminersorlutik Oqartussat aningaasaliissutigisartagaannut sanilliunneqartariaqartut, borgmester Asii Chemnitz Narup isumaqarpoq.
Suliffissaaleqinerup akiorneqarnissaanut aningaasaliissutinit, kommunit allat pingasut suliffissaaleqisumut ataatsimut 37.000 koruunit pisaraat, suliffissaaleqisumut ataatsimut nalilisorlugit, Kommuneqarfik Sermersuup taamaallaat 24.000 koruunit pisarpai.
- Kommunitsinni suliffissaaleqineq akikinnerusumik Naalakkersuisunit akiorneqarniarsinnaasorineqarpat, tamanna pissusissamisoorsorineqarsinnaanngilaq, aamma kommunini allani suliffissaaleqisut amerlaqisut ukiut tamaasa kommunitsinnut nuuttarnerat naatsorsueqqissaarnerit takutitaat eqqarsaatigalugu, Asii Chemnitz Narup erseqqissaavoq.
Ilanngullugu taassuma aamma erseqqissarpaa, kommuninit allanit nutsernerujussuaq pissutigalugu isumaginninnermut allatigut kommunip aningaasartuutigisartagai tatisimaneqartut, minnerunngitsumillu inissaaleqisut amerlareeqisut suli taamatut amerlisarneqartuartut.
