Aalisarnermut inatsisissaq pillugu akerliussutsimik takutitsinerit politikikkullu oqallinnerit pinerisa nalaaniinnitsinni nunatsinni qitiutinneqarnerpaasussat puigorneqarsimarpasipput, tassaasut aalisakkat.

Puigorsimagaannilu Pinngortitaleriffimmukarluni aalisakkat qaleruallillu pillugit immikkoortortamut paasiniaasoqariaannaavoq.

Pinngortitaleriffik sinnerlugu naalakkersuisunut piujuaannartitsineq tunngavigalugu aalisakkanik qalerualinnillu pisassiissutit pillugit siunnersuisarpoq. Uani pineqarput raajat, saarulliit qalerallillu.

Imatta pissarititaasa siunissami kingulissatta aamma atorluarsinnaassappatigut tamannarpiaavoq aalisarneq pillugu inatsisissamut atatillugu pingaarnertut suliniutissanut ilaatinneqartoq.

Kalaallit Nunaata imartaani kangerluinilu aalisagaqassuseq qanoq innersoq paasiniarlugu KNR-imiit Pinngortitaleriffimmut pulaarpugut.

– Sinerissap avataani aalisagaqassuseq, pitsaasutut oqaatigisinnaavarput,

Helle Siegstad, aalisakkat qaleruallillu pillugit ilisimasalik oqarpoq.

– Sinerissap qanittuani kommunini pingasuni avannaaniittuni qaleraleqarfinni qalerallit pisarineqartartut minneruleriartortut maluginiarparput. Taamaammat sinerissap qanittuani qaleralittassiissutit ukiuni kingullerni arlalinni ikinnerulernissaat inassuteqaatigisarparput.

Helle Siegstad, Pinngortitaleriffimmi aalisakkanut qalerualinnullu immikkoortortami pisortaasoq oqarpoq.

Inassut malinneqanngippat qalerallit pisarineqartartut milligaluttuinnassapput.

Siunnersuisarfik

Helle Siegstad naalakkersuisunut siunnersuuusioraangat - aalajangiisussat tassaalersarput aalisartut allallu aalisarnermi susassaqartut - pingaartumik pisassiissuteqarfigineqartussat ikiliartornerat paasineqaraangat.

Kalaallit Nunattami sineriaani aalisagaqassuseq qalerualeqassuserlu sorpassuarnit sunnerneqarsinnaasarpoq, soorlu silap pissusaata allanngorneranit aamma immap seernassusianit.

Kalaallit Nunaata sineriaani maajimiit novembarimut angalanikkut aalisakkanik qalerualinnillu misissuinerit pisarput, soorlu aalisagaqassuseq misissorneqartarluni. Ukiup sinnerani paasisat misissoqqissaarneqartarput, siunnersuusiornermut atatillugu nalunaarsuinerit inassuteqaatissanillu nalilersuinerit pisarlutik. Assi © : Birgitte Kjeldsen

- Iliuuserisinnaasatuarput tassaavoq, aalisarnermi pisassiisarnermik nakkutiginnilluarnissaq. Helle Siegstad erseqqissaavoq imalu nangilluni:

- Aalisagaqassuseq atorluarusukkaanni, aalisakkat pisarineqarsinnaasut ikilisinneqartariaqarput.

Naallu Pinngortitaleriffimmit aalisakkanik pisassiinerit ikinnerulernissaanik siunnersuisoqartaraluartoq, siunnersuutit malinneqarneq ajortut Helle Siegstad nassuiaavoq.

Sinerissap qanittuani qaleralittassat ikinnerulernissaat inassuteqaatigineqartaraluartoq inassuteqaatit malinneqartannginnerat assersuutissaavoq.

- Malinneqavinneq ajorput, takusaannarparpummi inuussutissarsiuteqartunut assigiinngitsunut pisassiisoqartartoq, taamaammat arlalinnik suli inissitassaqaqaaq, Helle Siegstad oqarpoq.

Aalisapilunneq

Pinngortitaleriffiup Qeqertarsuup Tunuani qaleralittassiinermi pisassiissutit ukioq manna 5.215 tonsiunissaat inassutiginikuusaa assersuutissaavoq.

TAC-ili, naalakkersuisut ukiumoortumik pisassiinerannut tunngaviusoq malillugu qaleralittassiissutit marloriaataapput – 10.600 tonsiugamik.

Pinngortitamik nungusaataanngitsumik atuinissaq soorlu aalisarnermut inatsisissami nutaami pingaartinneqartutut nipeqartinneqaraluartoq, piviusut allarluinnaapput.

Aalisarneq pillugu ataatsimiititaliarsuami ilaasortaasimavoq suleqataallunilu. Ataatsimiititaliami aalisarnermik inuussutissarsiorneq qanoq siunissami allanngortinneqassanersoq tassani eqqartortarsimavaat, soorlu aalisarnermik aallutaqartut ikilisinnissaat.

– Pisassiissutissat aalajangerneqareeraangata, aalisartooriaatsinut assigiinngitsunut agguaanneqartarput, umiatsiaaraarsortunut anginerulaartunillu umiatsialinnut, oqarpoq.

Saarulliit, ammassassuit, uillut allarpassuillu misissornerini nalunaarusiat Pinngortitaleriffimmi toqqortaapput. Assi © : Birgitte Kjeldsen

 - Nalilersuinerit saniatigut aalisarnermik inuussutissarsiorneq qanoq allaasumik naalakkersuinikkut suleriaaseqarluni siunissami isumagineqassanersoq aamma oqaluuserineqartarpoq, aalisakkammi pisarineqartartut amerlinnginnissaat siunertaavoq. Kisianni tamakku uanga qanimut isummersorfigisimanngilakka. oqarpoq.

Helle Siegstadili neriuutaarutinngilaq, Kalaallit Nunaata sineriaani avataanilu aalisagaqassuseq aamma piujuaannartitsineq tunngavigalugu sulerusussuseqarneq uani eqqarsaatigai. Aalisarnermummi inatsisissap qanoq imaqarnissaa politikerit aallajangiiffigisassaraat.