Hammond: Nunatta USA-mut piumasaqaatai inornanngillat pissusissamisoorlutillu
Amerikamiut nunatsinniinnerannit pissarsiaqarnerunissamik Nunatta piumasaqarnera Amerikamiut salliutinnissaannik Trump politikkeqartillugu paasitikkuminaatsorujusuussaaq.
Nunatta Danmarkillu siunnersuutaat marluk, Nunatta pissarsisarnerunissaanik imaqartut, Amerikamiut itigartikkaat, KNR-imi ukioq manna siusinnerusukkut oqaluttuaraarput.
Inatsisartulli nunanut allanut sillimaniarnermullu tunngasunut ataatsimiititaliaata siulittaasua, Aleqa Hammond, isumaqatigiinniarnernut isumalluarpoq:
- Nunatta piumasaqaatai inornanngitsutut pissusissamisoortutullu isigineqartariaqartutullu isumaqarfigivarput.
Kiffartuussinissamik maanna isumaqatigiissutaasoq siuliminit akikinneroqigami pitsaasuusoq, Amerikap nunanut allanut aallartitaa, Carla Sands, KNR-imit apersoratsinni oqarpoq.
Aamma isumaqatigiissut isumaqatigiissutaasoq, Vectrus Servicesillu kiffartuussisuunissaannik isumaqatigiissut Amerikami eqqartuussivinnit ajunngitsuusutut oqaatigigaat, taanna aamma oqarpoq.
Hammond tupaallattoq
Tamannalu Aleqa Hammondip tupaallaatigaa:
- Isumaqarpunga tupaallaatiginaqutaa unaasoq, Amerikap qallunaat nunaannut aallartitaat taamaa erseqqaritsigisumik naammassisimarpalutsigisumillu oqariartuuteqarnera - soorunami soqutisatik aallaavigigamikkit. Uagutsinnut tupaallaataalaarpoq, suliaq naammassivittutut isigineqanngitsutut oqaatigineqartarsimasoq piareersimaarpalaartorujussuarmik oqalunnera soorunami uagut malersoqqissavarput, Hammond oqarpoq.
AAMMA ATUARUK Kinap Kalaallit Nunaanni ingerlataqalernissaanut USA ammaasseqataasinnaavoq
Pituffik pillugu nutaarluinnarmik isumaqatigiissusiortoqassanersoq, Carla Sand oqarumanngilaq:
- Allat tamanna oqaloqatigiissutigaat, taana oqarpoq.
Nunanut allanut tunngasunut naalakkersuisoq, Vivian Motzfeldt, marlunngormat ilisimatitsivoq, nutaamik isumaqatigiissutaajumaartussaq pillugu USA-mut isumaqatigiinniarnerit suli ingerlasut, qanorli inerneqarumaarneri oqaatigissallugit siusippallaartut.
AAMMA ATUARUK Kiffartuussinissamik isumaqatigiissutip nutaap aningaasartuutivut affaannanngortippai
