Nunatta CO2-mik aniatitsinera annikilliartorpoq

Pilersaarut annertuvoq. Ukiuni tulliuttuni 16-ini USA-mi aamarsuarnik nukissiorfiit 1600-juusut CO2-mik anititsinertik 30 procentinik appartissavaat. Obamap siusinnerusukkut neriorsuutigisani taamaalilluni eqquutsissavai.

Obamap ullumi nalunaarutaa, Naatsorsueqqissaartarfiup Nunatta gassinik silaannarmik kissakkiartortitsisartunik mingutsitsineranut 2012-imut tunngasumut ullumi saqqummiussaanut attuumassuteqarluinnarpoq.

Nunatsinni eqqortup tungaanut ingerlasoqartoq, kisitsisit takutippaat, gassimmi silaannarmik kissakkiartortitsisartut Nunatsinnit aniatinneqartut 2012-imi 611.702 tonsiupput.

Tamanna 2011-mut sanilliullugu 20 procentingajammik minneruvoq.

Ukiuni 2010-mi 2011-milu mingutsitsinerup annerulersimanera takussutissaqarpoq, ukiunimi taakkunani uuliamik ujaasisoqarmat, mingutsitsinerlu tamarmiusoq 2012-imi ukiuni qulini aatsaat taama appasitsigisoq paasinarsilluni.

Nunatsinni gassit silaannarmik kissakkiartortitsisartut 94 procentiisa missaat nukissiuutinik atuinermeersuupput.

Taamaalilluni ikummatissanik atuineq, soorlu solaarimik, petruuliumik benziinamillu atuineq, 2012-imi mingutsitsinerup tamarmiusup 93,6 procenterigaa Naatsorsueqqissaartarfimmit oqaatigineqarpoq.

Kisitsisit saqqummersitami taaguutilimmi "2012-imi silaannarsuarmi mingutsitsineq"-mi takuneqarsinnaapput, taanna Naatsorsueqqissaartarfiup nittartagaanit www.stat.gl-imit aaneqarsinnaavoq atuarneqarsinnaalluniluunniit.