Nunatsinni Volleyballimik pissartanngorniunnerit poorskikkunni ingerlanneqassapput

Nunatsinni sapaatit akunnerat timersornikkut pisoqarfiunerpaasartoq poorskikkunni pisarpoq. Ujakkaarluni snowboarderlunilu, qimussimik, inuusuttut assammik arsaallutik, nerrivimmi arsaararluni volleyballerlunilu nunatsinni pissartanngorniuttoqassaaq. Taakku amerlanersaat Nuummi ingerlanneqassapput, aamma Volleyballimik nunatsinni pissartanngorniunnerit Nuummi ingerlanneqartussaagaluarput, peqataasussalli najugaqarfissaannik ajornartorsiuteqartoqarnera pissutigalugu nunatsinni pissartanngorniunnerit volleyballertartoqarfissuarmut Maniitsumut nuunneqartariaqarsimapput.
Allattoq Peter Troelsen, Simon Uldum
marsip 19-at 2013 08:01

Unammersuaqataasussat arnani holdit tallimat peqataassapput, angutinilu holdit arfineq marluussallutik. Timersoqatigiiffiit peqataasussat sinerissamit tamaneersuupput. TVK Tasiilamit, PVN Nuummit, GSS Nuummit, AVI  Maniitsumit, KTVI Kangaamiunit, IVK Ilulissanit volleyballertartullu timersoqatigiiffittaavat Arctic Volleyball Sisimiut.

Ukioq manna Kalaallit Volleyballertartut Kattuffiat pilersinneqarnerminit ukiunik 30-inngortorsiorluni nalliuttorsiorpoq, tamannalu ukioq manna pisussatigut assigiinngitsutigut malunnartinniarneqassaaq. Soorlu upernaamut maajimi meeqqat sinerissameersut Kidsvolleyballimik unammiuaartinniarneqarlutik, aammattaaq nalliuttorsiorneq Maniitsumi unammersuarnerni annertunngikkaluamik unammersuariartunut malunnartinniarneqassaaq.

 

Maniitsumi unamminerit sapaatiuppat aallartissapput, pingasunngorpamiillu ulloqeqqanit unnussuarmut unammisoqartassalluni. Sisamanngorpat medaaliannatsissoqassaaq. Arnat bronzenanniunnerat nal. 10.00 aallartissaaq nal. 12.00-ilu angutit bronzenanniunnerat aallartissalluni. Nunatsinni volleyballertartut pissartaat arnani sisamanngorpat nal. 14.00 angutinilu nal. 16.00 ingerlanneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq