Nunatsinni ukiormanna uuliasiorluni qillerisoqassagunanngilaq
Nunatsinni oqartussaasut qinnuteqarnissamut killigititaq sioqqutilaarlugu qinnuteqaatinik suli tigusaqarsimanngillat aammalu uuliasioqatigiinnit Nunatta imartaani uuliasiorluni misissuinissamut akuersissutinik pigisaqartunit misissuilluni qillerinissamik soqutiginnittunik tusagaqarsimanatik.
- Tamanna tusarlugu nuannerluinnarpoq. Uuliasioqatigiimmi ukiut pingajussaat navianarsinnaasumik qillerissanngillat aammalu akuutissanik annertuupilussuarmik Kalaallit Nunaata imartaanut aniatitsisoqassanani. Kalaallit Nunaatami imartaani annertuumik uuliakoortoqassagaluarpat tamanna avatangiisinut aalisarnermullu ajorluinnartumik kinguneqartussaavoq, taamatummi pisoqassagaluarpat danskit sakkutuui uuliasioqatigiillu saliisinnaanngillat. Kalaallit naalakkersuisuisa qillerinerit unikaallanneranni uuliasiorluni qillerinerit ineriartortitsinissamut suliffinnillu pilersitsinissamut ilumut aqqutiginiarneqassanersut eqqarsaatigilluarniassagaat neriuutigaara, Jon Burgwald, Greenpeacemi issittoq pillugu akisussaasoq oqarpoq.
Kalaallit Nunaanni naalakkersuisut juulli sioqqutilaarlugu Tunup avannaani misissuiffissatut immikkoortortanut sisamanut akuersissutinik nutaanik tunniussipput. Kalaallit Nunaanni misileraalluni qillerinerit 14-it maannamut ingerlanneqarsimapput, taakkulu tamarmik Kitaani pisimallutik, tamarmillu uuliamik susaarfiusimapput. Qillerinerit kingulliit Nuup avataani 2011-mi Skotlandimiut uuliasioqatigiit ingerlassimavaat.
