Nunarsuarmi coronavirusertut 10 millioninngortut
Johns Hopkins Universitytimi nalunaarsukkani tamanna takuneqarsinnaavoq.
Nunarsuaq tamakkerlugu nappaat tuniluuttumut tunngatillugu tusarliussassat aamma allamik alianartoqarput.
Maannami inuit millionit affaat covid-19-imik toqquteqarsimasutut nalunaarsorneqarput . Nunarsuaq tamakkerlugu inuit 499.124-it coronamik attuumassuteqartumik toqquteqarsimasut ullumi nalunaarsorneqarput.
AAMMA ATUARUK New Yorkimi Berlinimilu arpaqatigiinnissaraluit coronavirus pissutigalugu taamaatinneqartut
USA-mi Europamilu coronamik tunillanneqarsimasutut nalunaarsorneqartut amerlanerpaapput.
USA-miinnaq inuit 2,5 millionit tunillanneqarsimapput, taakkunanngalu 125.429-it toqusimasutut ullumi nalunaarutigineqarlutik.
Europami nunani assigiinngitsunik 2,6 millionit tunillatsissimasutut nalunaarsorneqarsimapput, taakkunanngalu 195.975-it toqusimsut, nutaarsiassaqartitsivik AFP allaaserisaqarpoq.
Coronavorus siaruaatipiloortoq
Euromi nunani amerlasuuni tunillaassuunneq toqquteqartarnerlu sapaatip akunnerini kingullerni ikiliartoraluartut USA-mi pissutsit allaapput.
USA-mimi ulluni kingullerni coronamik tunillatsissimasutut nalunaarsorneqarsimasut amerliartoqqilersimapput, inuillu 40.000-it tunillatsissimallutik.
Tunillaassuunneq Floridami, Texasimi Arizonamilu amerlanerpaapput, tunillaassuunnerlu ajorsiartuinnarluni.
CNN naapertorlugu USA-mi naalagaaffeqatigiinni 50-iusunit naalagaaffiit marluinnaat tunillaassuiffiunerat ikileriarsimapput.
AAMMA ATUARUK USA registrerer over to millioner coronasmittede
Tunillaassuunnerup sukkasuumik ingerlaannera peqqutigalugu, nalaagaaffiit naalagaaffeqatigiinni ilaasut aqqaneq marluk nunap ammariartoqqilernissaannut unitsitsiniarlutik aalajangerput.
Coronavirusip tunillaassuunnera USA-miinnaq ajornartorsiutaanngilaq. Brasiliamimi Indiamilu ulluni kingullerni coronavirusimik tunillatsissimasutut nalunaarsorneqartut annertusingaatsiarput.