Nunarput pillugu filmi tammatsaalineqarpoq
Tammatsaalineqartut ilaat tassaavoq Jette Bang-ip 1940-mi kalaallit pillugit filmiliaa Inuit-mik qulequtserneqarsimasuusoq. Filmi taanna Danmarkip katersugaasivissuata qarasaasiamut nussorsimasaasa akornaniippoq. Inuiaqatigiillu pillugit ilisimatusartup Anne Mette Jørgensen-ip filmitoqqanik qarasaasiamut nussuinermi ataqatigiissaarisuusup filmit tamavimmik takusimasuuai.
- Filmitoqqat eriagisassat qallunaat kalaallillu pigisaraat. Taakkumi ukiuni 100-ni kingullerni qallunaat kalaallillu naapinneri pillugit oqaluttuaqimmata, Anne Mette Jørgensen oqarpoq.
Filmitoqqat nunarsuaq tamakkerlugut angalasimasut filmiliarisimasuuaat, tamarluinnarmillu Danmarkip katersugaasivissuanut tunissutigineqarsimallutik. Nunatsinni filmiliat amerlanersaat Naalagaaffiup Kalaallit Nunaannut aqutsisoqarfiata - tassa Grønlandsstyrelsep - 1920-kkut 1940-kkullu akornanni Nunatta nunasiaatinngorsarneqarnera pillugu filmiliornissat suliakkiutigisarsimanerisa kinguneraat.
- Filmit 16 milimeterit 30-ikkunni, 40-kkunni 50-ikkunnilu atugaaqaat, katersortarfinnilu takutinneqartarneri taamani inuusut puigunaatsittassajunnarsivaat. Ukiulli ingerlanerini atorunnaarneqariartorput, naggataagullu filmitoqqat maanga katersugaasivissuarmut tunniussuunneqareermata kingorna puigorneqarsimagaluarlutik, Anne Mette Jørgensen oqarpoq.
Filmitoqqallu ilinniartitsinermut TV-milu aallakaatitassiani atorneqaqqissinnaalluartutut Anne Mette Jørgensenip piukkuppai, Kalaallit Nunaatalu oqaluttuarisaaneranik siunissami ilisimatusartussanut piukkunnarnerarlugittaaq.
- Ilami nunasiaateqarnertaannaa qiviaraanni qallunaat kalaallillu qanoq ataqatigiitsiginersut filmitoqqani takuneqarsinnaapput, asulu filmiliortut nunasiaateqartutut isiginnittariaasii assini allagartalersornerinilu ersareqalutik. Taamaammat filmitoqqat ilisimatusaatigissallugit piukkunnaqaat, Anne Mette Jørgensenip, Danmarkip katersugaasivissuani inuiaqatigiit pillugit ilisimatusartup filmitoqqat taama unnersiutigai.
Filmitoqqat 16 millimeteriusut Danmarkip Filminik toqqortaasiviani maanna tunniunneqarsimalerput, tassanilu asiusussaajunnaarlugit nillataartitsivimmiitinneqarlutik.
Aamma Danmarkip katersugaasivissuata Nunatsinni sullissiviit arlallit attavigisimavaat, filmitoqqallu nunatsinni siaruarneqarnissaat siunertarineqarluni neqeroorutigineqarsimallutik.
