Nunarput Nunavullu imminnut ilinniarfiginerulerniarput

Suleqatigiinnissamik isumaqatigiissusiornissaq, tikeraarnermi siunertarineqanngilaq, nunalli marluk akileriinnerminni iluaqutissaat Kuupik V. Kleistip Nunavummilu Naalakkersuisut siulittaasuata Eva Aariaap ataatsimeeqatigiittarnerminni oqaloqatigiissutigaat.

Nunatsiaq News ullumi allappoq, Naalakkersuisut siulittaasui marluk isumaqatigiittut, nunatsinni Nunavummilu assigiinngitsutigut ineriartornermut tunngatillugu nunat taakkua marluk attaveqatigiinnerat siumut aallariartinneqartariaqartoq.

- Nunavup Nunattalu inissisimanerat assigiittupilussuupput, Kuupik V. Kleist Nunatsiaq Newsimut oqarpoq nangillunilu:

- Aatsitassanik ujarlertoqartupuilussuuvoq, taamaakkaluartorli  suliniutit suli amerlanngitsuararsuit qalluinermik iluaqutiginnilernermilluunniit kinguneqartarput. Arlariilluta naatsorsuutigaarput neriuutigalugulu, misissuinerit ilaat aatsitassanik piaalernermut pisuussutinilluunnit iluaqutiginnilernermut ingerlariaqqissasut, Kuupik V. Kleist oqarpoq.

Taassuma tikeraarfia, Nunavut nalakkersuisuisa siulittasuat, Eva Aariak, oqarpoq, pisuussutinut atuinissamut ineriartortitsineq eqqarsaatigalugu Nunavut Nunatsinniit kingulliusoq.

- Kalallit Nunaat tamatumani siuarsimaneruvoq. Tamanna oqaluuserisatta ilagaat. Tassa isumassarsianik periutsinillu avitseqatigiittarnissaq taavalu immitsinni ilinniarfigeqatigiittarnissaq, Eva Aariak oqarpoq.