Nunarput misigisassarsiorumatuut Klubbiannit nersorniarneqartoq
Atuakkami ippassaq nioqqutigineqalersumi Kalaallit Nunaanni angalaartarsimasut suli inuusut toqoreersullu 29-t oqaluttuaannik imalimmi, angalatoorsuit Peter Freuchenip aamma Ejnar Mikkelsenip oqaluttuaannik tusagassiortullu Martin Breumip aamma igasup Nikolaj Kirkip oqaluttuaannik imaqarpoq.
Misigisassarsiorumatuut Klubbiannut, Eventyrernes Klub-imut, Peter Freuchenimit tungnavilerneqarsimasumut Kalaallit Nunaat immikkut ittumik malunnaateqartuarsimavoq.
Nannut iluliarsuillu pillugit oqaluttuat ilaat uppernarpianngitsut aamma uumasut naasullu, toqu ajunaarnerillu kiisalu kalaallit tukkornerat inussiarnersuunerallu pillugit oqaluttuat atuarneqarsinnaasut, saqqummersitsisarfik Gyldendal allappoq.
Atuakkap saqqummersinneranut atatillugu Misigisassarsiorumatuut Klubbiat Nordisk Film aaqqissuusseqatigalugu Kalaallit Nunaat pillugu unnussiuaartitsiniarput. Tamanna Københavnimi, Falkoner Bio-mi Frederiksbergimiittumi pissaaq. Unnuup ingerlanerani erinarsoqatigiittoqassaaq qilaatersortoqassalluni aamma Nikolaj Kirkip puisip neqaanik suaasalimmik igaavi misilinneqarsinnaassallutik. Atuakkami ilanngusisut ilaat arlallit angalanilersaassapput, avannaarsuani Sullualuk aqqusaarlugu umiatsiamik angalaneq, sisoraaserluni Sermersuakkut itivinneq aamma Nunatsinni erngup nukinganik nukissiorfimmi sulineq ilaatigut oqaluttuarineqassallutik.
