Nunarput Danmarkilu aatsitassat pillugit isumaqatigiissuteqartut
Naalakkersuisut ullumi taama nalunaaruteqarput.
Isumaqatigiissut aappaagu januaarip aallaqqaataaniit 2019-imi decembarip 31-ata tungaanut atuutissaaq, maannakkullu ukiunut tallimanut suleqatigiinnissamik isumaqatigiissutaasoq taarsissallugu.
Isumaqatigiissut nutaaq pingasunut agguataarneqarpoq: Sinaakkutissatut, suliniutinut aamma siunnersuisarnissamut isumaqatigiissut. Sinaakkutissatut isumaqatigiissut, atsioqatigiissutigineqaqqammersoq, suliniutinut siunnersuisarnermullu isumaqatigiissuteqartitsisinnaavoq.
AAMMA ATUARUK GEUS-ip GSG-ssaq suleqatissamitut isigaa
Danmarkimi Kalaallit Nunaannilu ujarassiuutut misissuiffik GEUS suleqatigalugu siunnersuisarnertut, ilisimatusarnermik pilerisaarinermilu suliniutinik piviusutut ilusilinnik Kalaallit Nunaanni geologiskimik piginnaasanik pilersikkiartortitsinissamik isumannaarinermillu GEUS-ip peqataaqataanissaa ilaatigut isumaqatigiissutigineqarpoq, soorlu aamma Kalaallit Nunaanni geologiskimik piginnaasanik ilisimasanillu pissarsiortornerit GEUS-ip tapersersussagai, Naalakkersuisut allapput.
Isumaqatigiissutip nutaap atsiorneqarneratigut ilisimatusarnikkut paasissutissanillu suliassaqarfikkut GeoSurvey Greenlandimik, naatsunngorlugu GSG-mik, pilersitsiniarneq tapersersussavaa, GSG-lu pilersaarutit naapertorlugit 2016-imi januaarip aallaqqaataani pilersinneqassalluni. GSG-mut inatsisissatut tunngavissaq Inatsisartut ukiaanerani ataatsimiinnissaanni oqaluuserineqassaaq.
AAMMA ATUARUK Danskit aatsitassat pillugit siunnersuisarnerat Nunatta atorunnaarniaraa
- Geologiskimik misissuinermi GEUS-ip annertuumik peqataajuarnissaa isumaqatigiissutip nassataraa, aammalu nunami maani geologiskimik piginnaasatsinnik pilersitsiniarnitsinni suliaqarfigalugu ikiussavaatigut. Tamanna assut iluarisimaarpara, Inuussutissarsiornermu Aatsitassanullu Naalakkersuisoq Jens Erik Kirkegaard, Danmarkip silap pissusianut, nukissaqarnermut sanaartornermullu ministerianik Rasmus Helveg Petersenimik atsioqatigiissuteqareerluni oqarpoq.
GSG pilersaarutit malillugit 40-nik sulisoqassaaq, ingerlanneqarnissaalu katillugit 51,5 millionit koruuninik akeqassangatinneqarpoq, sanaartornernullu aningaasartuutit taassuma saniatigut aamma pisariaqartinneqassallutik.
